اسرائیل کےساتھ جنگ،شہیدایرانی شہریوں کی تعداد900سےتجاوزکرگئی

ایران اور اسرائیل کے درمیان جاری جنگ کے دوران شہید ہونے والے ایرانی شہریوں کی تعداد 900 سےتجاوزکرگئی۔

ایران کے سرکاری میڈیا کے حوالے سے بتایا ہے کہ 12 روزہ جنگ کے دوران ایران میں کم از کم 935 افراد شہید ہوئے، جن میں 132 خواتین اور 38 بچے بھی شامل ہیں۔ یہ اعداد و شمار ایرانی وزارتِ انصاف کے ترجمان نے جاری کیے۔

واضح رہے کہ اسرائیل نے 13 جون کو ایران پر حملوں کا آغاز کیا تھا، جن کے ابتدائی مرحلے میں اعلیٰ فوجی افسران اور جوہری سائنسدانوں کو نشانہ بنایا گیا۔

جوابی کارروائی میں ایران نے اسرائیلی علاقوں پر شدید میزائل حملے کیے، جن کے نتیجے میں اسرائیل میں 28 افراد ہلاک ہوئے۔

اس دوران امریکا نے بھی ایران میں موجود فردو، اصفہان اور نطنز کی جوہری تنصیبات پر فضائی حملے کیے اور ان کی مکمل تباہی کا دعویٰ کیا۔

دونوں ممالک کے درمیان بالآخر 24 جون کو جنگ بندی عمل میں آئی۔