ایرانی حملوں کے باعث ہزاروں اسرائیلی بے گھر
ایران کے اسرائیل پر میزائل حملوں کےنتیجے میں اسرائیل میں ہزاروں شہری بےگھر ہوگئے۔
اسرائیلی اخبار یدیعوت احرونوت نے اسرائیلی پراپرٹی ٹیکس کپمنسیشن فنڈ کا حوالہ دیتے ہوئے کہا ہے کہ ایران کے ساتھ جاری جنگ کے آغاز سےاب تک 8 ہزار 190 اسرائیلی شہری اپنے گھروں سے بےدخل ہو چکے ہیں۔
رپورٹ کےمطابق میزائل حملوں سے عمارتوں، گاڑیوں،ذاتی اشیا اور دیگر سامان کو پہنچنے والے نقصان پر 30 ہزار سے زائد کلیمز بھی جمع کروائے گئے ہیں۔
خیال رہےکہ ایران اور اسرائیل کے درمیان حالیہ جنگ کا آغاز 13 جون کو ہوا جب اسرائیل نے ایران کے مختلف مقامات بشمول فوجی اورجوہری تنصیبات پر فضائی حملے کیے۔ جواباً ایران نے بھی اسرائیلی علاقوں پر میزائل برسائے۔
اسرائیل کا ایران میں جوہری تحقیقاتی مرکز پر حملہ
غیر ملکی خبررساں ایجنسی کے مطابق اسرائیلی حکام کا کہنا ہےکہ اب تک ایرانی میزائل حملوں میں کم از کم 25 افراد ہلاک اور سیکڑوں زخمی ہو چکے ہیں۔
دوسری جانب ایرانی میڈیا رپورٹس کےمطابق اسرائیلی حملوں میں اب تک ایران میں 639 افراد شہید اور 1300 سے زائد زخمی ہو چکے ہیں۔
