اقوام متحدہ نےغزہ کو قحط زدہ قرار دے دیا

اقوام متحدہ نے غزہ کے متعدد علاقوں کو باضابطہ طور پر قحط زدہ قرار دے دیا ہے اور خبردار کیا ہے کہ آنے والے ہفتوں میں صورتحال مزید بگڑ سکتی ہے۔

اقوام متحدہ کے گلوبل ہنگر مانیٹر انٹیگریٹڈ فوڈ سیکیورٹی فیز کلاسیفیکیشن کی تازہ رپورٹ کے مطابق اس وقت غزہ کی کل آبادی کا تقریباً ایک چوتھائی، یعنی 5 لاکھ 14 ہزار افراد قحط کا شکار ہیں، جبکہ یہ تعداد ستمبر کے آخر تک بڑھ کر 6 لاکھ 41 ہزار تک پہنچ سکتی ہے۔

رپورٹ کے مطابق سب سے زیادہ سنگین صورتحال شمالی غزہ، بالخصوص غزہ سٹی میں ہے جہاں باضابطہ طور پر قحط کی حالت موجود ہے اور صرف اس خطے میں 2 لاکھ 80 ہزار سے زائد لوگ بھوک سے مر رہے ہیں۔ اس کے علاوہ دیر البلح اور خان یونس بھی آئندہ ماہ قحط کا شکار ہو سکتے ہیں۔

دوسری جانب اسرائیل نے اقوام متحدہ کی اس رپورٹ کو مسترد کرتے ہوئے مؤقف اختیار کیا ہے کہ غزہ میں قحط کی کوئی صورتحال نہیں ہے۔ اسرائیلی وزارتِ خارجہ کے مطابق جنگ کے آغاز سے اب تک ایک لاکھ سے زائد امدادی ٹرک غزہ میں داخل ہو چکے ہیں۔