امریکا کا سعودی عرب کو جدید ایف-35 لڑاکا طیارے فروخت کرنے پر غور جاری

امریکا کی جانب سے سعودی عرب کو جدید ایف-35 لڑاکا طیارے فروخت کرنے پر غور جاری ہے۔

خبر ایجنسی کے مطابق ذرائع نے بتایا کہ سعودی عرب نے ایف-35 طیاروں کی خریداری کی باضابطہ درخواست دی تھی، جس کے بعد ٹرمپ انتظامیہ اس درخواست کا تفصیلی جائزہ لے رہی ہے۔

رپورٹ میں کہا گیا ہے کہ اربوں ڈالر مالیت کے اس ممکنہ معاہدے کے لیے ٹرمپ کابینہ اور امریکی کانگریس کی حتمی منظوری درکار ہوگی۔ تاہم پینٹاگون، وائٹ ہاؤس اور محکمہ خارجہ نے اس معاملے پر کسی قسم کا تبصرہ کرنے سے گریز کیا ہے۔

واضح رہے کہ سعودی عرب نے رواں سال کے آغاز میں صدر ڈونلڈ ٹرمپ سے براہِ راست یہ درخواست کی تھی۔ یہ طیارے امریکی کمپنی لاک ہیڈ مارٹن کی تیار کردہ مصنوعات ہیں۔

ذرائع کے مطابق پینٹاگون اس ممکنہ دفاعی معاہدے پر غور کر رہا ہے اور ابھی تک کوئی حتمی فیصلہ نہیں کیا گیا۔