کیا حریم شاہ ہنی مون منانے ترکی پہنچی ہیں؟

گزشتہ دنوں پیپلز پارٹی کے رکن سندھ اسمبلی سے شادی کا دعویٰ کرنے والی ٹک ٹاک اسٹار حریم شاہ نے ترکی کی لوکیشن کے ساتھ انسٹاگرام پر ویڈیوز جاری کردیں جس کے بعد سوشل میڈیا صارفین یہ سوال پوچھ رہے ہیں کہ کیا واقعی اپنے دعوے کے مطابق ہنی مون منانے کے لیے حریم اپنے شوہر کے ہمراہ ترکی پہنچ گئی ہیں یا یہ بھی نکاح کے شوشے کی طرح ایک اور پبلسٹی سٹنٹ ہے؟
یاد رہے کہ حریم شاہ نے گزشتہ ماہ 28 جون کو دعویٰ کیا تھا کہ انہوں نے پیپلز پارٹی کے رکن سندھ اسمبلی اور صوبائی وزیر سے خاموشی سے شادی کرلی اور وہ شوہر کے ہمراہ ہنی مون کے لیے 4 جولائی کو ترکی جائیں گی۔ اب حریم شاہ نے انسٹاگرام پر جاری کی گئی دو ویڈیوز میں ترکی کی لوکیشن ڈالی ہے، تاہم اس بات کی تصدیق نہیں ہوسکی کہ وہ ترکی ہی میں موجود ہیں یا کسی اور جگہ؟
حریم شاہ نے ترکی کی لوکیشن کے ساتھ دو ویڈیوز شیئر کیں، جس میں سے ایک ویڈیو میں وہ گانے پر پرفارم کرتی دکھائی دیتی ہیں اور مذکورہ ویڈیو کے ساتھ انہوں نے استنبول کی معروف ٹورسٹ سائٹ کی لوکیشن بھی ڈال رکھی ہے۔
حریم شاہ نے دوسری ویڈیو ایک ہوٹل میں بنائی اور مذکورہ ویڈیو سے واضح نہیں ہو رہا کہ مذکورہ ہوٹل ترکی کا ہی ہے یا کسی اور شہر کا ہے؟ ہوٹل کے اندر بنائی گئی ویڈیو میں حریم شاہ 4 جولائی کی شب لاہور میں ہونے والے پانچویں ہم اسٹائل ایوارڈز شو میں اداکاراؤں کی جانب سے پہنے گئے بولڈ اور نیم عریاں لباس پر بات کرتی دکھائی دیں۔مذکورہ ویڈیو میں حریم شاہ کا کہنا تھا کہ لوگ صرف ٹک ٹاک اسٹار کو تنقید کا نشانہ بناتے ہیں اور ٹک ٹاک والوں کو ہی بے حیائی پھیلانے کا سبب قرار دیتے ہیں، اب ایسے لوگ کہاں ہیں اور وہ اداکاراؤں کے لباس پر بات کیوں نہیں کر رہے۔ حریم شاہ کی جانب سے شیئر کی گئی دونوں ویڈیوز میں ترکی کے شہر استنبول کے دو مختلف علاقوں کی لوکیشن ڈالی گئی، تاہم تصدیقی طور پر کچھ نہیں کہا جا سکتا کہ وہ ترکی گئی ہیں یا پاکستان میں بیٹھ کر وہاں کی لوکیشن استعمال کر رہی ہیں۔واضح رہے کہ سوشل میڈیا پلیٹ فارمز صارفین کو مواد شیئر کرتے وقت کسی بھی شہر اور ملک کی لوکیشن شامل کرنے کے فیچرز فراہم کرتے ہیں۔
خیال رہے کہ حریم شاہ نے 28 جون کو پی پی رہنما سے شادی کا دعویٰ کرتے وقت ہی کہا تھا کہ وہ 4 جولائی کو ہنی مون کے لیے ترکی جائیں گے اور وہاں سے واپسی پر وہ کراچی میں آکر ولیمے کی تقریب منعقد کریں گے۔ حریم شاہ نے اگرچہ پیپلز پارٹی کے رہنما سے شادی کا دعویٰ کیا تھا، تاہم انہوں نے کسی بھی صوبائی وزیر یا رکن اسمبلی کا نام نہیں لیا تھا۔
ان کے دعوے کے بعد پیپلز پارٹی کے بعض رہنماؤں کے ساتھ سوشل میڈیا پر ان کی تصاویر شیئر کی گئیں، جس کے بعد رکن اسمبلی سید ذوالفقار علی شاہ، صوبائی وزیر سعید غنی، تیمور ٹالپر اور مرتضیٰ وہاب نے بھی ٹک ٹاک اسٹار سے متعلق اپنی خبروں کو مسترد کیا تھا۔
بعد ازاں پیپلز پارٹی کے چیرمین بلاول بھٹو زرداری نے بھی مذکورہ معاملے پر بات کرتے ہوئے کہا تھا کہ ٹک ٹاک اسٹار کا دعویٰ صرف ’شوشہ‘ ہے اور یہ سب کچھ مسائل سے توجہ ہٹانے کے لیے کیا گیا۔
بعض سوشل میڈیا صارفین یہ دعویٰ بھی کر رہے ہیں کہ حریم نے شادی کا جو شوشہ چھوڑا تھا وہ ناکام ہوگیا جس کے بعد میڈیا کی توجہ حاصل کرنے کے لئے اب وہ ترکی میں ہنی مون منانے کا دعویٰ کررہی ہیں۔ صارفین کا کہنا ہے کہ حریم شاہ کے دعووں پر تب تک یقین نہیں کیا جا سکتا جب تک وہ اپنے شوہر کو منظر عام پر لے کر نہیں آتیں۔