افغان صوبے ہرات میں موسیقی کے سیکڑوں آلات ضبط کر کے جلادیئے گئے
افغانستان کے صوبے ہرات میں محکمہ اخلاقیات نے موسیقی کے سیکڑوں آلات ضبط کر کے جلا دیے۔افغان میڈیا کے مطابق محکمہ اخلاقیات کی جانب سے ہرات شہر اور مختلف اضلاع سے ضبط کیے گئے سیکڑوں موسیقی کے آلات کو نذر آتش کردیا گیا۔محکمہ اخلاقیات کا کہنا ہے کہ موسیقی کے آلات کی فروخت حرام ہے اور فروخت کرنے والے کو سزا دی جائے گی۔
افغان ویمن چیمبر آف کامرس اینڈ انڈسٹریز کے مطابق طالبان کے نئے حکم کے بعد ملک بھر میں تقریباً 12ہزار بیوٹی پارلرز بند ہوگئے۔افغان ویمن چیمبر آف کامرس اینڈ انڈسٹریز کا کہنا تھا کہ ہزاروں بیوٹی پارلرز کی بندش سے 60 ہزار افغان خواتین اپنی آمدنی سے محروم ہوجائیں گی۔
رپورٹس کے مطابق کابل میں بیوٹی پارلر کی بندش کے خلاف خواتین نے مظاہرہ بھی کیا تھا جن پر طالبان حکام کی جانب سے واٹر کینن کا استعمال کیا گیا تھا اور ہوائی فائرنگ کی گئی تھی۔
