افغان شہری پاکستان میں روزگار کماتے ہیں اور خونریزی بھی لاتے ہیں ،خواجہ آصف

وزیر دفاع خواجہ آصف نے فتنۂ خوارج کے دہشت گردوں کی فائرنگ سے زخمی ہو کر شہادت پانے والے میجر عدنان اسلم کو خراجِ عقیدت پیش کرتے ہوئے کہا ہے کہ افغان شہری ہماری سرزمین پر روزگار کما رہے ہیں، لیکن انہی کی سرزمین سے آنے والے دہشت گرد ہمارے بچوں کا خون بہا رہے ہیں۔

خواجہ آصف نے کہا کہ پاک فوج نے ایک اور بہادر سپوت وطن پر قربان کر دیا۔ ان کے مطابق ہلاک ہونے والے پانچ دہشت گردوں میں سے تین افغان شہری جبکہ دو کا تعلق کالعدم ٹی ٹی پی سے تھا۔

انہوں نے کہا کہ ’’ہم نے جن افغانوں کے لیے دو طویل جنگیں لڑیں، اپنا امن و معیشت قربان کی، لاکھوں شہادتیں ہوئیں، آج وہی ہماری زمین پر 60 سے 70 لاکھ کی تعداد میں رہ کر روزگار کما رہے ہیں، بڑے بڑے ٹرانسپورٹر اور ارب پتی ٹھیکیدار بن گئے ہیں‘‘۔

وزیر دفاع نے مزید کہا کہ افغان سرزمین سے آنے والے دہشت گرد اور شہری ہمارے بچوں کے خون سے ہولی کھیل رہے ہیں، دنیا کی تاریخ میں اس طرح کی محسن کشی کبھی نہیں ہوئی۔