آل راؤنڈر شاداب خان کے دائیں کندھے کی کامیاب سرجری
پاکستان کرکٹ ٹیم کے نائب کپتان اور آل راؤنڈر شاداب خان کے دائیں کندھے کی کامیاب سرجری کر دی گئی ہے۔
سوشل میڈیا پر اپنے پیغام میں شاداب خان نے مداحوں کو مطلع کیا کہ ان کی سرجری بحمدللہ کامیابی سے مکمل ہو گئی ہے۔ انہوں نے کہا، "الحمداللہ، میری سرجری کامیاب رہی، اب اگلا مرحلہ ریکوری اور ری ہیب کا ہے۔”
شاداب نے مداحوں سے دعا کی اپیل کرتے ہوئے کہا، "آپ سب کی دعاؤں اور حمایت کا شکریہ، براہِ کرم جلد صحت یابی کے لیے دعا کریں۔”
میڈیکل ذرائع کے مطابق، سرجری کے بعد شاداب خان کو کم از کم تین ماہ کے لیے کرکٹ سے آرام کا مشورہ دیا گیا ہے، جس کے باعث وہ آئندہ شیڈول بنگلا دیش اور ویسٹ انڈیز کے خلاف سیریز میں شرکت نہیں کر سکیں گے۔
یہ پیش رفت ایسے وقت میں سامنے آئی ہے جب قومی ٹیم آئندہ ماہ بنگلا دیش کے خلاف تین ٹی ٹوئنٹی میچز پر مشتمل سیریز کی تیاریوں میں مصروف ہے۔ ذرائع کے مطابق، دورے کے لیے اسکواڈ کا اعلان آئندہ ہفتے متوقع ہے۔
شاداب خان کی ستمبر میں متوقع ایشیا کپ میں شمولیت بھی غیر یقینی صورتِ حال کا شکار ہو گئی ہے، جبکہ پاکستان کرکٹ بورڈ (پی سی بی) نے ان کی مکمل ریکوری سے متعلق کوئی باضابطہ ٹائم لائن یا واپسی کی تاریخ جاری نہیں کی ہے۔
یاد رہے کہ شاداب خان حالیہ مہینوں میں متعدد انجری مسائل کا شکار رہے، اور میڈیکل ٹیم کی تجویز پر ان کے کندھے کا آپریشن ناگزیر ہو گیا تھا۔
