امریکہ کا پاکستان میں اربوں ڈالر کی سرمایہ کاری کا اعلان

امریکی سرمایہ کاروں نے کہا ہے کہ امریکا پاکستان میں اربوں ڈالر کی سرمایہ کاری کرنا چاہتے ہیں۔امریکی عوام کو پاکستان کی حقیقی تصویر نہیں دکھائی گئی، گزشتہ 4 سال میں بائیڈن انتظامیہ نے جو کیا وہ مناسب نہیں تھا۔
امریکی سرمایہ کاروں کے وفد کےسربراہ جینٹری بیج نے اسلام آباد میں صحافیوں سے گفتگو کرتے ہوئے کہا کہ پاکستان آکر بہت خوش محسوس کررہا ہوں، یہاں کے لوگ بہت ذہین اور محنتی ہیں۔پاکستان اور امریکا کےتعلقات دہائیوں پر محیط ہیں،صدر ٹرمپ کی سربراہی میں پاکستان کے ساتھ تعلقات کے نئے دورکا آغاز ہور ہاہے۔پاکستان سے متعلق غلط فہمیاں دور کرنے کی ضرورت ہے۔
جینٹری بیج نےکہا کہ امریکی عوام کو پاکستان کی حقیقی تصویر نہیں دکھائی گئی، پاکستان میں مختلف شعبوں میں سرمایہ کاری کے وسیع مواقع ہیں۔
امریکی وفد کے سربراہ جینٹری بیج نے کہا کہ پاکستان کی موجودہ قیادت نئی امریکی قیادت کے ساتھ مکمل ہم آہنگ ہے، بائیڈن انتظامیہ کا پاکستان سے رویہ مناسب نہیں تھا جب کہ آج امریکی سرمایہ کاروں کا وفد مختلف شعبوں میں سرمایہ کاری کے لیے پاکستان آیا ہے۔
جینٹری بیج نے کہا کہ پاکستان نےدہشت گردی کیخلاف جنگ میں 80 ہزارجانوں کی قربانی دی، امریکی پاکستان کی قربانیوں کا اعتراف کرتے ہیں مگر اب دنیا میں امن اور ترقی کے نئے دور کا آغاز ہوچکا ہے۔ ٹرمپ اقتصادی سفارت کاری پر یقین رکھتے ہیں، امریکا پاکستان میں اربوں ڈالر کی سرمایہ کاری کرنا چاہتا ہے، مصنوعی ذہانت،رئیل اسٹیٹ، معدنیات میں سرمایہ کاری کے خواہشمند ہیں۔
امریکی وفد کے سربراہ جینٹری بیج نے کہا کہ اروبار اور تجارت کیلئےپل کا کردار ادا کرنا چاہتے ہیں، دونوں ممالک کے درمیان سازگارکاروباری ماحول پیدا کرنےکی ضرورت ہے، روزگار کے مواقع میں اضافہ اور ہنر مند افرادی قوت ترجیح ہے۔صحافی کی جانب سے پوچھے گئے سوال پر امریکی سرمایہ کار نے کہا کہ امریکی انتظامیہ پاکستانی قیادت کا احترام کرتی ہے، رچرڈ گرینل کو پاکستان کی صورتحال کا آج زیادہ بہتر ادراک ہوگیا ہوگا، میرے خیال میں رچرڈ گرینل کو ڈیپ فیک ٹیکنالوجی سےگمراہ کیا گیا، وہ پاکستان کے نظام انصاف کی مکمل حمایت کرتے ہیں۔
انہوں نے مزید کہا کہ ڈونلڈ ٹرمپ شاندار امریکی صدر ہیں، ہم ٹرمپ کے اقتصادی سفارت کاری کے ایجنڈے کو کامیاب بنائیں گے، پاکستانی قیادت کے ساتھ میری ملاقاتیں بہت اچھی رہی ہیں۔