امریکی خاتون کو انٹرنیٹ پر اپنا کھویا چینی دوست مل گیا

 انٹر نیٹ پر امریکی خاتون کو 7 برس کے طویل عرصے بعد چین میں اپنا کھویا ہوا دوست بالآخر مل گیا۔

امریکی خاتون سیلیا نے چینی سوشل میڈیا ایپ ریڈ نوٹ پر چینی کمیونیٹی سے اپنے سابق کلاس فیلو سائمن کی تلاش کیلئے مدد طلب کی۔

اپنی جذباتی ویڈیو میں انہوں نے بتایا کہ وہ 18-2017 میں آئیووا میں ایک نجی کیتھولک اسکول جاتی تھیں جہاں ان کی دوستی سائمن (ایک چینی ایکسچینج طالب علم) سے ہوئی۔ تاہم، اس کے چین واپس لوٹنے کے بعد ان سے رابطہ منقطع ہو گیا۔

امریکی خاتون نے کہا کہ وہ چاہتی ہیں کہ اس ایپ پر موجود تمام صارفین ان کی مدد کریں۔چینی برادری اس اپیل کے بعد سیلیا کی مدد کیلئےاکٹھی ہوگئی۔خاتون نے سائمن کی ایک پرانی تصویر شیئر کی جس کی پہچان کر کے کسی نے سائمن کو بتایا اور چند گھنٹوں بعد سیلیا کی ویڈیو پر سائمن نے کمنٹ کر دیا۔

کمنٹ میں سائمن نے لکھا ’ہیلو، میں سائمن ہوں۔ میں نے کبھی نہیں سوچا تھا کہ میں اپنی دوست کے ساتھ اس طرح برسوں بعد دوبارہ مل سکوں گا۔ ریڈنوٹ پر مدد کرنے والے ہر شخص کا بے حد شکریہ۔‘