آرمی چیف کی حکومت کو حمایت کی یقین دہانی:ایس آئی ایف سی اجلاس کا اعلامیہ جاری

چیف آف آرمی اسٹاف جنرل عاصم منیر نےحکومت کو معاشی استحکام کےحوالے سے اقدامات کے لیےپاک فوج کی حمایت کےپختہ عزم کا یقین دلایا ہے۔

خصوصی سرمایہ کاری سہولت کونسل کی ایپکس کمیٹی کےگیارہویں اجلاس کا اعلامیہ جاری کردیا گیا۔

اعلامیے کے مطابق وزیراعظم کی زیر صدارت منعقدہ اجلاس میں ایس آئی ایف سی کے تحت اٹھائے گئے مختلف اقدامات کاجائزہ لیا گیا، اجلاس میں آرمی چیف، وفاقی کابینہ، صوبائی وزرائے اعلیٰ،وزیراعظم آزاد جموں و کشمیر ، وزیر اعلیٰ گلگت بلتستان اور اعلیٰ سطح کےسرکاری حکام نے شرکت کی۔

سیکریٹری ایپکس کمیٹی نےقومی اقتصادی پلان کے منصوبے اڑان پاکستان’ (2024-2029)کےحوالے سےایس آئی ایف سی کے اسٹریٹجک فوکس،اقدامات اور شراکت کے بارے میں آگاہ کیا۔

کمیٹی نے ملک کے بہتر ہوتے میکرو اکنامک حالات پر اطمینان کا اظہارکرتےہوئے پائیدار اقتصادی ترقی کو یقینی بنانے اور معاشی بہتری کا فائدہ عوام تک پہنچانے کے حوالےسے اجتماعی کوششوں کی اہمیت پر زور دیا۔

کمیٹی نے پاکستان کے صنعتی منظرنامے کو نئے سرے سے بحال کرنےکےلیےخصوصی اقتصادی زونز ایس ای زیز کی اصلاحات کےلیےایکشن پلان کی منظوری دی۔

کمیٹی نے نیشنل منرلز ہارمونائزیشن فریم ورک جو کہ تمام اسٹیک ہولڈرز کی مشاورت سے تیار کیا گیا ہے، کی تجویز کا بھی جائزہ لیا۔

فورم کو انسانی وسائل کی ترقی (ایچ آر ڈی)کے شعبے میں مختلف اقدامات کے بارے میں بریفنگ دی گئی جن کی بدولت افرادی قوت کی مہارتوں کوعالمی معیار کے مطابق بنایا جا سکے گا۔

وزرائے اعلیٰ نےاپنےاپنےصوبوں میں جاری اقدامات کےحوالے سے بریفنگ دی جن سے معاشی ترقی کو فروغ ملے گا۔

چیف آف آرمی اسٹاف نے معاشی استحکام کے لیےحکومت کے اقدامات، جن سے امن و امان اور سیکیورٹی بہتر بنانے میں مدد ملے گی، کےلیےپاک فوج کی حمایت کے پختہ عزم کا یقین دلایا۔

آخر میں وزیر اعظم نے 2025 کے دوران مستقبل کی سرگرمیوں کے لیے حکمت عملی ترتیب دینے میں ایس آئی ایف سی، وزارتوں، محکموں اور منسلک اسٹیک ہولڈرز کے کردار کو سراہا۔انہوں نے ملک کے وسیع تر مفاد میں تمام سطحوں پر اجتماعی کوششوں کی اہمیت پر بھی زور دیا۔