مصنوعی ذہانت کو معیشت کی ترقی کیلئےاستعمال کیاجائے،وزیراعظم
وزیراعظم شہبازشریف کاکہنا ہے کہ مصنوعی ذہانت کو معیشت کی ترقی، صنعتی پیداوار میں اضافے، سرکاری نظام کی شفافیت اور نوجوانوں کے لیے نئے مواقع پیدا کرنے کے لیے استعمال کیا جائے گا۔
وزیراعظم کی زیر صدارت مصنوعی ذہانت اور ڈیجیٹل معیشت کے فروغ سے متعلق ایک اہم اجلاس اسلام آباد میں منعقد ہوا، جس میں جدید ٹیکنالوجی کے استعمال کو تیز کرنے اور ڈیجیٹل معیشت کے دائرہ کار کو وسعت دینے کے لیے متعدد اہم فیصلے کیے گئے۔
شہباز شریف نے کہا کہ حکومت آئی ٹی اور مصنوعی ذہانت کے شعبے کو ترجیحی بنیادوں پر فروغ دے رہی ہے تاکہ ملکی معیشت کو جدید خطوط پر استوار کیا جا سکے۔ انہوں نے واضح کیا کہ مصنوعی ذہانت کو صنعتی پیداوار میں اضافے، سرکاری نظام میں شفافیت، نوجوانوں کے لیے روزگار کے نئے مواقع پیدا کرنے اور معیشت کو مضبوط کرنے کے لیے استعمال کیا جائے گا۔
وزیراعظم نے ہدایت دی کہ ڈیجیٹل معیشت کے نفاذ کو AI کے ذریعے مؤثر اور تیز بنایا جائے تاکہ پاکستان خطے میں ٹیکنالوجی کے میدان میں نمایاں مقام حاصل کر سکے۔
انہوں نے مصنوعی ذہانت سے متعلق قومی پالیسی کے مؤثر نفاذ پر زور دیتے ہوئے کہا کہ ڈیٹا پروٹیکشن، پرائیویسی اور ڈیٹا سورینیٹی جیسے پہلوؤں کو خاص طور پر مدنظر رکھا جائے۔ وزیراعظم نے مصنوعی ذہانت کے ذمہ دارانہ استعمال کو یقینی بنانے کی بھی ہدایت کی تاکہ تعلیم، صحت، زراعت اور سیکیورٹی سمیت اہم شعبوں میں اس ٹیکنالوجی سے عوام کو براہ راست فائدہ پہنچایا جا سکے۔
اجلاس میں فیصلہ کیا گیا کہ مصنوعی ذہانت کے فروغ اور نفاذ کے لیے ایک اسٹیئرنگ کمیٹی تشکیل دی جائے گی جو پالیسی پر عمل درآمد کی نگرانی کرے گی، جب کہ ماہرین پر مشتمل ایک ایڈوائزری پینل بھی قائم کیا جائے گا جو تکنیکی رہنمائی فراہم کرے گا۔
