عاشورہ محرم،حکومت کا5اور6جولائی کو تعطیل کااعلان

وفاقی حکومت نے عاشورہ محرم کے موقع پر 5 اور 6 جولائی (9 اور 10 محرم الحرام) کو عام تعطیل کا اعلان کر دیا ہے۔
کابینہ ڈویژن کی جانب سے جاری نوٹیفکیشن کے مطابق9اور10محرم الحرام کو سرکار یدفاتربند رہیں گے۔
ادھر محرم الحرام کے دوران ممکنہ سیکیورٹی خدشات کے پیشِ نظر وزارت داخلہ نے ملک بھر میں پاک فوج کی تعیناتی کا فیصلہ کیا ہے تاکہ مجالس اور جلوسوں کے دوران امن و امان کی فضا برقرار رکھی جا سکے۔
وزارت داخلہ کے اعلامیے کے مطابق چاروں صوبوں، گلگت بلتستان، آزاد کشمیر اور اسلام آباد میں فوجی دستے سیکیورٹی فرائض انجام دیں گے۔ یہ فیصلہ صوبائی حکومتوں اور دیگر انتظامی اداروں کی درخواست پر کیا گیا، جنہوں نے محرم کے دوران حساس علاقوں میں اضافی سیکیورٹی کی ضرورت پر زور دیا تھا۔
فوج کی تعیناتی آئین کے آرٹیکل 245 کے تحت عمل میں لائی گئی ہے، جس کے تحت فوج سول اداروں کی معاونت کے لیے تعینات کی جا سکتی ہے۔ فوجی اہلکار مقامی پولیس اور رینجرز کے ساتھ مل کر مشترکہ گشت، چیکنگ اور نگرانی کے فرائض انجام دیں گے۔