بلوچستان دھماکا : پاک فوج کے 5 جوان شہید، کلیئرنس آپریشن میں 5 دہشت گرد ہلاک
بلوچستان کے ضلع کیچ میں آئی ای ڈی دھماکے میں پاک فوج کے کیپٹن سمیت پانچ جوان شہید جب کہ کلیئرنس آپریشن میں فتنۃ الہندوستان کے پانچ دہشت گرد ہلاک کردیے گئے۔
پاک فوج کا شعبہ تعلقات عامہ (آئی ایس پی آر) کے مطابق بلوچستان کے ضلع کیچ کے علاقے شیر بندی میں سینیٹائزیش آپریشن کے دوران آئی ای ڈی دھماکا ہوا جس کے نتیجےمیں پاک فوج کے 5 جوان شہید ہوگئے۔
آئی ایس پی آر کے مطابق شہید ہونے والوں میں کیپٹن وقار احمد، نائیک عصمت اللہ اور لانس نائیک جنید احمد، لانس نائیک خان محمد اور سپاہی محمد ظہور شامل ہیں۔
آئی ایس پی آر کےمطابق کلیئرنس آپریشن کے دوران بھارتی پراکسی نیٹ ورک فتنۃ الہندستان کے 5 دہشت گردوں کو جہنم واصل کردیا گیا جب کہ علاقے میں سرچ اور سینیٹائزیشن آپریشن جاری ہے تاکہ کسی بھی دیگر بھارتی حمایت یافتہ دہشت گردوں کو بھی انجام تک پہنچایا جاسکے۔
آئی ایس پی آر کاکہنا ہےکہ شہداء کی عظیم قربانیاں ہمارے عزم کو مزید مضبوط کرتی ہیں۔ترجمان پاک فوج نے کہا ہے کہ سکیورٹی فورسز،پوری قوم کے ساتھ شانہ بشانہ،ملک کو بھارتی سرپرستی میں ہونےوالی دہشت گردی سے مکمل طور پر پاک کرنے تک اپنی جدوجہد جاری رکھیں گی۔
