پشاور سی ٹی ڈی تھانے میں دھماکا، ایک اہلکار شہید، دو زخمی
پشاور میں انسدادِ دہشت گردی (سی ٹی ڈی) کے تھانے میں دھماکے کے نتیجے میں ایک پولیس اہلکار شہید جبکہ دو زخمی ہو گئے۔
ابتدائی اطلاعات کے مطابق دھماکا یونیورسٹی روڈ پر واقع سی ٹی ڈی تھانے کے اسلحہ خانے میں ہوا، جس سے عمارت کا ایک حصہ منہدم ہو گیا۔
سی سی پی او پشاور کے مطابق، واقعہ اسلحہ خانے میں رکھے پرانے دھماکا خیز مواد کے پھٹنے کے باعث پیش آیا۔ دھماکے کے بعد وہاں آگ بھڑک اٹھی جو دیگر گولا بارود تک پھیل گئی، جس سے مزید دھماکے ہوئے۔
پولیس حکام کا کہنا ہے کہ تھانے میں موجود ملزمان کو فوری طور پر سی ٹی ڈی ہیڈکوارٹرز منتقل کر دیا گیا ہے، جبکہ تھانہ اور اطراف کے علاقے کو سیل کر دیا گیا ہے۔
بی ڈی یو (بم ڈسپوزل یونٹ)، ریسکیو اور فائر بریگیڈ کی ٹیمیں موقع پر موجود ہیں اور کلیئرنس و امدادی کارروائیاں جاری ہیں۔
پولیس کے مطابق، ابتدائی تحقیقات کے مطابق یہ واقعہ دہشت گردی کی کارروائی نہیں لگتا بلکہ ایک حادثاتی دھماکا معلوم ہوتا ہے۔
