ڈرگ کوکین کوئین انمول پنکی کا14روزہ جوڈیشل ریمانڈمنظور
مبینہ کوکین کوئین انمول عرف پنکی کو جمعہ کے روز منشیات کے متعدد مقدمات اور ایک قتل کیس میں 14 روزہ جوڈیشل ریمانڈ پر جیل بھیج دیا گیا۔
انمول کو رواں ماہ کے آغاز میں کراچی سے 2 مقدمات میں گرفتار کیا گیا تھا، جن کا تعلق منشیات رکھنے اور بغیر لائسنس اسلحہ رکھنے سے تھا۔
گرفتاری سے قبل بھی اس کے خلاف کئی فوجداری مقدمات درج تھے، جبکہ اس کے خلاف فعال مقدمات کی تعداد ایک درجن سے تجاوز کر چکی ہے۔
انمول کو سخت سیکیورٹی میں سینٹرل جیل کے جوڈیشل کمپلیکس لایا گیا۔
جسمانی ریمانڈ مکمل ہونے پر اسے بغدادی، سپیشلائزڈ انویسٹی گیشن یونٹ، گزری اور درخشاں تھانوں میں درج مقدمات کے سلسلے میں متعلقہ جوڈیشل مجسٹریٹس کے روبرو پیش کیا گیا۔
جمعہ کو انمول کے خلاف ایک منشیات کیس، ایک قتل کیس اور 10 پرانے منشیات مقدمات میں جسمانی ریمانڈ کی مدت مکمل ہوئی۔
