فیلڈ مارشل عاصم منیر کی مصری صدر سے ملاقات، دوطرفہ تعلقات پر تبادلہ خیال
آرمی چیف فیلڈ مارشل عاصم منیر نے مصر کے صدر عبدالفتاح السیسی سے ملاقات کی، جس میں دوطرفہ تعلقات، خطے کی صورتحال اور امتِ مسلمہ کو درپیش چیلنجز پر تبادلہ خیال کیا گیا۔
آئی ایس پی آر کے مطابق ملاقات قاہرہ کے اتحادیہ صدارتی محل میں ہوئی۔ فریقین نے پاکستان اور مصر کے درمیان دیرینہ دوستانہ اور برادرانہ تعلقات کو مزید مضبوط بنانے کے عزم کا اعادہ کیا۔
ملاقات میں خطے میں امن و استحکام، عالمی حالات اور باہمی دلچسپی کے مختلف امور پر تفصیلی گفتگو ہوئی۔ فیلڈ مارشل عاصم منیر نے علاقائی استحکام کے لیے مصری قیادت کے کردار کو سراہا۔
مصری صدر عبدالفتاح السیسی نے عالمی اور امتِ مسلمہ کے اہم معاملات میں پاکستان کے مثبت اور فعال کردار کی تعریف کرتے ہوئے کہا کہ پاکستان امت کے اتحاد اور امن کے فروغ کے لیے ہمیشہ تعمیری کردار ادا کرتا ہے۔
ترجمان پاک فوج کے مطابق فریقین نے باہمی اسٹریٹجک مفادات، دفاعی تعاون، سماجی و معاشی تعلقات، ٹیکنالوجی اور سکیورٹی کے شعبوں میں اشتراکِ عمل بڑھانے پر اتفاق کیا۔
دونوں رہنماؤں نے اس بات پر زور دیا کہ پاکستان اور مصر کے عوام کے درمیان تاریخی اور ثقافتی رشتے دوستی اور باہمی احترام کی بنیاد پر استوار ہیں، جنہیں مزید فروغ دینے کی ضرورت ہے۔
