کراچی،پٹاخوں کے گودام میں آتشزدگی،2 افراد جاں بحق، 34 زخمی
کراچی میں پٹاخوں کے گودام میں زوردار دھماکے کے بعد لگنے والی آگ پر قابو پا لیا گیا ہے،واقعے میں 2 افراد جاں بحق جبکہ 34 افراد زخمی ہوگئے۔
عینی شاہدین کے مطابق دھماکے کے بعد اُٹھنے والا گھنا دھواں دور سے دکھائی دے رہا تھا جبکہ قریب کھڑا ایک رکشہ بھی شعلوں کی لپیٹ میں آگیا۔
اطلاع ملتے ہی کے ایم سی فائر بریگیڈ کی 5 گاڑیاں، ایک اسنارکل اور ایک باؤزر موقع پر پہنچ گئے، جب کہ پولیس، رینجرز اور بعد ازاں ایس ایس یو کمانڈوز نے بھی ریسکیو آپریشن میں حصہ لیا۔ چھت پر پھنسے افراد کو بحفاظت نکالا گیا۔
ایس ایس پی ساؤتھ کے مطابق گودام میں پہلے دھماکا ہوا جس کے بعد آگ بھڑکی، جس کی شدت نے قریبی دکانوں اور عمارتوں کو بھی شدید نقصان پہنچایا۔ متعدد عمارتوں کے شیشے ٹوٹ گئے، جس سے کئی لوگ زخمی ہوئے۔
ریسکیو حکام کے مطابق 34 زخمیوں کو جناح اور سول اسپتال منتقل کیا گیا، جن میں سے 4 کی حالت نازک ہے۔
وزیراعلیٰ سندھ سید مراد علی شاہ نے واقعے کا نوٹس لیتے ہوئے کمشنر کراچی کو ہدایت دی کہ زخمیوں کو فوری طبی امداد فراہم کی جائے اور حادثے کی تفصیلی رپورٹ پیش کی جائے۔ انہوں نے کہا کہ رہائشی اور تجارتی علاقوں میں اس نوعیت کے خطرناک مواد کی تیاری یا ذخیرہ عوام کی زندگیوں کے لیے سنگین خطرہ ہے اور اس کی اجازت نہیں دی جانی چاہیے۔
