پاکستان، چین کےمسائل پر غیر متزلزل حمایت جاری رکھے گا،وزیراعظم
وزیراعظم شہباز شریف نے کہا ہے کہ پاکستان چین کے بنیادی مسائل پر ہمیشہ غیر متزلزل حمایت فراہم کرتا رہے گا۔
وزیراعظم ہاؤس میں چینی وزیر خارجہ وانگ ژی اور اعلیٰ سطحی وفد سے ملاقات کے دوران وزیراعظم کے ہمراہ نائب وزیراعظم و وزیر خارجہ اسحٰق ڈار اور آرمی چیف جنرل سید عاصم منیر بھی موجود تھے۔
وزیراعظم شہباز شریف نے سی پیک فیز ٹو پر اطمینان کا اظہار کرتے ہوئے کہا کہ یہ منصوبہ پاکستان کی سماجی و اقتصادی ترقی کے لیے نہایت اہمیت رکھتا ہے۔ انہوں نے پاک–چین تعاون مزید بڑھانے کے عزم کو دہرایا اور صدر شی جن پنگ کی قیادت کو خراج تحسین بھی پیش کیا۔
اس موقع پر چینی وزیر خارجہ نے پاک–چین تعلقات کو نئی بلندیوں پر لے جانے کے عزم کا اعادہ کیا۔
اس سے قبل، وانگ ژی نے ایوان صدر میں صدر آصف علی زرداری سے بھی ملاقات کی، جس میں دوطرفہ تعاون اور علاقائی سلامتی پر تبادلہ خیال ہوا۔ صدر زرداری نے کہا کہ پاکستان اور چین آہنی بھائی اور ہر موسم کے آزمودہ شراکت دار ہیں۔ انہوں نے مسئلہ کشمیر، پاکستان کی خودمختاری اور قومی ترقی پر چین کی اصولی حمایت پر شکریہ بھی ادا کیا۔
علاوہ ازیں، اسلام آباد میں مشترکہ پریس کانفرنس سے خطاب کرتے ہوئے نائب وزیراعظم اسحٰق ڈار نے کہا کہ پاکستان اور چین کے تعلقات برادرانہ بنیادوں پر قائم ہیں اور دونوں ممالک ہر سطح پر تعاون بڑھانے کے لیے پرعزم ہیں۔
