میرے خلاف کوئی بولےگا تو خاموش نہیں رہوں گا،شیرافضل

پاکستان تحریک انصاف کےرہنما شیر افضل مروت کہا ہے کہ اگر کوئی میرےخلاف باتیں کرے گا تو مجھ سےخاموشی کی توقع نہیں رکھے۔

رہنما پی  ٹی آئی شیر افضل مروت کانجی ٹی وی سے گفتگو میں کہنا تھا کہ سلمان اکرم راجہ معاملے پر میں نے پارٹی  کو کمٹمنٹ دی کہ  مزید تنازع کھڑا نہیں کروں گا  لیکن کسی کو یہ  حق نہیں کہ خامواخواں میرے خلاف میڈیا پر بیٹھ کر بیانات دے، میرے خلاف کوئی بات کرے گا تو  ایسی صورت میں کوئی یہ توقع نہ رکھے  کہ میں خاموش رہوں  گا۔

شیرافضل مروت نے کہا کہ میڈیا پر آکر بات کریں گے تو ایشو بنیں گے،  چاہے وہ جو بھی ہو میرےحوالےسے بات کرے گا تو جواب ضرور دوں گا ۔ کچھ لوگوں کو میرے حوالے سے لوگوں کی محبت برداشت نہیں ہو رہی ہے، ہماری پارٹی میں پریشرگروپس ہیں، بانی پی ٹی آئی کے کان بھرے جاتے ہیں لیکن میں کبھی بانی پی ٹی آئی  کے پاس گروپنگ  کرنے کے لیے نہیں گیا، میرے پاس صرف عزت ہے براہ مہربانی اس کو مت چھیڑو۔

رہنماپی ٹی آئی شیرافضل مروت کا کہنا تھا کہ میرا خیال ہے حکومت اور پی ٹی آئی دونوں جانب سے صرف کریکر فائر ہو رہے ہیں لیکن مذاکرات کا عمل جاری  رہے گا، بات چیت  کے حوالے سے  بانی پی ٹی آئی پہلے ہی کہہ دیا کہ مطالبات  لکھ کر دے دیں تو معاملہ آگے بڑھ جانا چاہیے تھا۔

شیرافضل مروت کا کہنا تھا کہ بانی پی ٹی آئی سے ملاقات کرانا کوئی اتنا سنجیدہ مسئلہ نہیں ہے، عمران خان نے کہا کہ ملاقات نہیں  بھی کراتے تو مذاکرات کی ٹیبل پر بیٹھیں، بانی پی ٹی آئی سے ملاقات تو کوئی مسئلہ ہی نہیں ہے ۔

رہنما پی ٹی آئی کا کہنا تھا کہ اسپیکر قومی اسمبلی ایاز صادق  کا آج بیان دیکھا  لیکن میں سمجھتا ہوں کہ وہ کنوینئر ہیں، ان کو  تاریخ رکھ کر اجلاس بلانا چاہیے تھا، ہم نے ان کے سامنے وہ مطالبات  نہیں رکھے جو یہ پورے نہیں کر سکتے۔

شیر افضل مروت نے کہا کہ پی ٹی آئی بڑے تحمل کا مظاہرہ کر رہی ہے، حکومت کی طرف سے بد مزگی  پیدا کرنے کی کوشش کی جا رہی ہے، لیکن جب  مذاکرات کی ٹیبل پر بیٹھیں گے تو ماحول بہتر ہو جائے گا۔

 رہنما پی ٹی آئی کہنا تھا کہ22 سے 25 نومبر کی رات تک کیا ملاقاتیں ہو رہی تھیں؟ ظاہر ہے ہمیں آفرز ہوئی ، یہ غلط ہے کہ ہمیں کوئی آفر نہیں ہوئی۔ مجھے  ذاتی طور پر  نہیں معلوم کے  کسی کے  ساتھ بیک ڈور رابطہ ہوا  لیکن جس نے ماضی میں بیک ڈور رابطہ کیا وہ تو مذاکراتی ٹیم میں ہیں۔