کراچی ، بچوں میں موسمی بیماریاں پھیلنے لگیں

سرد موسم سے بچوں میں نمونیا، سانس کی نالی کے انفیکشن اور دیگر امراض تنفس میں اضافہ ہونے لگا ہے، 5 سال سے کم عمر بچے سب سے زیادہ متاثر ہو رہے ہیں۔

شہر قائد کے ہسپتالوں میں سانس کے امراض میں مبتلا مریضوں کی تعداد میں اضافہ دیکھا گیاہے، بالخصوص بچوں میں نمونیا، سانس کی نالی کے انفیکشن اور دیگر امراض تنفس میں اضافہ ہوا ہے۔

صدر پاکستان پیڈیاٹرکس ایسوسی ایشن ڈاکٹر وسیم جمالوی نے کہاہے کہ سردیوں کے آغاز کے ساتھ ہی بچوں میں سانس کی بیماریوں میں اضافہ ہوجاتا ہے۔انہوں نے کہا کہ سول ہسپتال میں جون 2024 سے دسمبر 2024 تک سانس کے مختلف امراض کے 4 ہزار سے زائد کیسز رپورٹ ہوئے ہیں۔

ڈاکٹر وسیم کے مطابق سول ہسپتال میں جون 2024 سے دسمبر 2024 تک 1000 بچوں میں نمونیا کی بھی تصدیق ہوئی۔

صدر پاکستان پیڈیاٹرکس ایسوسی ایشن نے مشورہ دیا کہ بچوں کو گرم کپڑوں میں رکھیں اور ٹھنڈی ہوا سے بچائیں، بند کمروں میں تازہ ہوا کی آمد کو یقینی بنایا جائے۔ وائرل انفیکشن سے بچوں کے بچاؤ کیلئے ویکسی نیشن پر توجہ دی جائے۔

رپورٹ میں بتایا گیا تھا کہ کراچی میں پھیپھڑوں کے امراض،کورونا، انفلوئنزا اور سانس کی نالی کا انفیکشن تیزی سے پھیلنے لگا ہے، ڈاؤ ہسپتال میں کھانسی، بخار کی علامات کے ساتھ آنے والے 25 سے 30 فیصد مریضوں میں کورونا مثبت آرہا تھا، ہسپتالوں میں بخار، کھانسی اور سانس لینے میں دشواری کے ساتھ آئے مریضوں میں اضافہ دیکھا گیا تھا۔