بھارتی چیف جسٹس کو کمرہ عدالت میں وکیل سے جوتاپڑگیا
بھارت کی سپریم کورٹ میں غیر معمولی واقعہ پیش آیا، جب ایک وکیل نے چیف جسٹس بی آر گوائی پر جوتا پھینک دیا۔
بھارتی میڈیا کے مطابق چیف جسٹس گوائی نے جیسے ہی دن کا پہلا مقدمہ سننا شروع کیا، تو اچانک 71 سالہ وکیل نے نعرے بازی شروع کردی اور جوتا چیف جسٹس کی جانب اچھال دیا۔
سکیورٹی اہلکاروں نے فوری کارروائی کرتے ہوئے ملزم کو حراست میں لے لیا۔
پولیس کے مطابق، ملزم وکیل کی شناخت راکیش کشور کے نام سے ہوئی ہے، جس نے صبح تقریباً 11:35 بجے کورٹ نمبر 1 میں کارروائی کے دوران یہ حرکت کی۔
سینئر پولیس افسر کے مطابق، ملزم کو فوراً سپریم کورٹ کی سکیورٹی یونٹ کے حوالے کردیا گیا۔
ابتدائی تفتیش میں معلوم ہوا ہے کہ راکیش کشور، جو مایور وہار کا رہائشی اور سپریم کورٹ بار ایسوسی ایشن کا رجسٹرڈ رکن ہے، چیف جسٹس کے حالیہ ریمارکس سے ناراض تھا۔
یہ ریمارکس مدھیا پردیش کے کھاجوراہو مندر سے متعلق ایک مقدمے کی سماعت کے دوران دیے گئے تھے۔
چیف جسٹس بی آر گوائی نے واقعے پر کوئی ردعمل نہیں دیا اور وکلا کو ہدایت دی کہ کارروائی معمول کے مطابق جاری رکھی جائے۔
