قطر پر اسرائیلی حملہ، عالمی منڈی میں خام تیل کی قیمتوں میں اضافہ

قطر پر اسرائیلی حملے کے بعد عالمی منڈی میں تیل کی قیمتوں میں اضافہ ریکارڈ کیا گیا ہے۔

گزشتہ روز اسرائیل نے قطری دارالحکومت دوحہ میں فلسطینی مزاحمتی تنظیم کے دفتر پر حملہ کرتے ہوئے حماس کی اعلیٰ قیادت کو نشانہ بنایا۔

اس کارروائی میں حماس رہنما خلیل الحیہ کے بیٹے اور معاون سمیت پانچ افراد شہید ہوئے۔ قطر نے اس حملے کو ملکی خودمختاری پر براہِ راست حملہ قرار دیتے ہوئے بھرپور جواب دینے کا اعلان کیا ہے۔

حملے کے فوری بعد عالمی منڈی میں خام تیل کی قیمتوں میں اضافہ ہوا۔ ڈیلو ٹی آئی خام تیل کی قیمت 0.6 فیصد بڑھ کر فی بیرل 62 ڈالر 63 سینٹ تک جا پہنچی، جب کہ برینٹ خام تیل کی قیمت میں بھی 0.6 فیصد اضافہ ہوا اور فی بیرل 66 ڈالر 39 سینٹ پر پہنچ گئی۔