خضدار: سیکیورٹی فورسز کی کارروائی ، 4 دہشتگرد ہلاک

بلوچستان کے ضلع خضدار میں سیکیورٹی فورسز کے آپریشن کے دوران 4 دہشتگرد مارے گئے۔

پاک فوج کے شعبہ تعلقات عامہ (آئی ایس پی آر) کے مطابق یہ آپریشن 17 ستمبر کو بھارتی سرپرستی یافتہ گروہ فتنہ الہندوستان کی موجودگی کی اطلاع پر کیا گیا۔ کارروائی کے دوران شدید فائرنگ کا تبادلہ ہوا جس میں 4 دہشتگرد ہلاک ہوگئے۔

آئی ایس پی آر کے مطابق فورسز نے دہشتگردوں کے ٹھکانے کو مؤثر انداز میں نشانہ بنایا، جہاں سے بھاری مقدار میں اسلحہ، گولہ بارود اور دھماکا خیز مواد بھی برآمد کیا گیا۔

فوج کا کہنا ہے کہ ہلاک دہشتگرد علاقے میں مختلف دہشتگردانہ کارروائیوں میں ملوث تھے۔ کسی بھی ممکنہ طور پر چھپے دہشتگرد کو ختم کرنے کے لیے کلیئرنس آپریشن جاری ہے۔

آئی ایس پی آر نے مزید کہا کہ سیکیورٹی فورسز بھارتی سرپرستی یافتہ دہشتگردی کو جڑ سے ختم کرنے کے لیے پرعزم ہیں اور دہشتگردی میں ملوث تمام عناصر کو انصاف کے کٹہرے میں لایا جائے گا۔