خان کی دو بہنوں کے ساتھ علیمہ کو رہائی کیوں نہیں ملی؟

عمران خان کی دو بہنوں ڈاکٹر عظمیٰ خان اور نورین نیازی کو تقریباً دو ماہ بعد فوجی اسٹیبلشمنٹ اور اس کی قیادت کے خلاف بیانیہ سازی سے گریز کی یقین دہانی پر رہائی مل گئی ہے، لیکن تیسری بہن علیمہ خان بدستور قید ہیں جو کہ تحریک انصاف کے بیرون ملک سے چلنے والے فوج مخالف سوشل میڈیا بریگیڈ کی نگران ہیں۔

اندرونی معاملات سے واقف حلقوں کے مطابق علیمہ خان کی رہائی کا معاملہ محض سیاسی بیانات تک محدود نہیں بلکہ تحریک انصاف کے اس سوشل میڈیا نیٹ ورک سے بھی جڑا ہوا ہے جو بیرون ملک سے آپریٹ ہوتا ہے اور جس کے ذریعے بانی پی ٹی آئی کے فوج مخالف بیانیے کو سوشل میڈیا پر پھیلایا جاتا ہے۔ ان حلقوں کا دعویٰ ہے کہ علیمہ خان اس نیٹ ورک کے اہم رابطوں اور سرگرمیوں سے واقف ہیں اور ان کی رہائی کے لیے اس آن لائن مہم کے طریقہ کار اور طرزِ عمل میں تبدیلی کی امید کی جا رہی ہے۔ امکان ہے کہ جب یہ سوشل میڈیا بریگیڈ اسٹیبلشمنٹ کے خلاف اشتعال انگیز مہمات سے گریز کرتے ہوئے اپنا طرزِ عمل تبدیل کرے گا تو علیمہ خان کی رہائی کی راہ بھی ہموار ہو جائے گی۔

معروف صحافی انصار عباسی نے روزنامہ جنگ میں اپنی رپورٹ میں دعویٰ کیا ہے کہ عمران خان کی دو بہنوں کی رہائی تحریک انصاف اور حکام کے درمیان حالیہ پس پردہ رابطوں کا پہلا ٹھوس نتیجہ ہے۔ ان کے مطابق ڈاکٹر عظمیٰ خان اور نورین نیازی نے یقین دہانی کرائی ہے کہ وہ آئندہ فوج اور اس کی اعلیٰ قیادت کو تنقید کا نشانہ بنانے والے بیانات نہیں دیں گی اور ایسے عوامی یا سیاسی اقدامات سے گریز کریں گی جن سے فوجی اسٹیبلشمنٹ کے ساتھ جاری کشیدگی میں اضافہ ہو۔ ذرائع کے مطابق اس مفاہمت کا بنیادی مقصد محاذ آرائی کم کرنا اور سیاسی معاملات کو مزید پیچیدہ ہونے سے بچانا ہے۔

انصار عباسی کے مطابق دونوں بہنوں کی رہائی کے معاملے کو آگے بڑھانے میں تحریک انصاف کے چیئرمین بیرسٹر گوہر علی خان، وزیر داخلہ محسن نقوی اور لاہور میں موجود بعض سرکاری رابطہ کاروں نے اہم کردار ادا کیا۔ رپورٹ کے مطابق پہلی مرتبہ عمران خان کے اہل خانہ بھی پس پردہ رابطوں کے اس عمل میں براہ راست شریک ہوئے اور ان کی یقین دہانیوں کے نتیجے میں جمعرات کو دونوں بہنوں کو کوٹ لکھپت جیل سے رہا کر دیا گیا۔ ذرائع کا کہنا ہے کہ دونوں خواتین نے غیر متنازع رہنے اور عوامی بیانات کے ذریعے پہلے سے جاری محاذ آرائی کو ہوا نہ دینے کا وعدہ کیا تھا۔

انصار عباسی کی رپورٹ میں یہ دعویٰ بھی کیا گیا ہے کہ عمران خان نے جیل میں اپنے وکلا سے حالیہ ملاقات کے دوران سابقہ سخت لب و لہجے سے گریز کیا اور وہ آگے بڑھنے کا کوئی راستہ تلاش کرنے کے لیے نسبتاً زیادہ آمادہ دکھائی دیے۔ ذرائع کے مطابق انہیں اپنی ذات سے زیادہ بشریٰ بی بی اور اپنی بہنوں کی فکر تھی اور وہ ان کی رہائی چاہتے تھے۔

رپورٹ میں اس تبدیلی کو پس پردہ رابطوں میں پیش رفت کا ایک اہم عنصر قرار دیا گیا ہے۔ تاہم پی ٹی آئی اور حکام کے درمیان کسی باضابطہ معاہدے کا عوامی سطح پر اعلان نہیں کیا گیا اور انصار عباسی کے مطابق اس مفاہمت کو برقرار رکھنے کا انحصار آئندہ بیانات اور عملی رویے پر ہوگا۔

ادھر علیمہ خان کی عدم رہائی کا معاملہ اس لیے اہم ہے کہ وہ اس سے پہلے بھی تحریک انصاف کے سوشل میڈیا نیٹ ورک اور ریاست مخالف آن لائن مہمات کے حوالے سے تحقیقاتی اداروں کی پوچھ گچھ کا سامنا کر چکی ہیں۔ فروری 2024 میں ایف آئی اے کے سائبر کرائم ونگ اور کاؤنٹر ٹیررازم ونگ نے انہیں الگ الگ انکوائریوں میں طلب کیا تھا۔ ان کے خلاف لگائے گئے الزامات میں عوام اور فوج کے درمیان تقسیم پیدا کرنے، نفرت انگیز مواد پھیلانے اور ریاستی اداروں کے خلاف مبینہ مہم چلانے کے معاملات شامل تھے۔ علیمہ خان نے ان نوٹسز کو اسلام آباد ہائی کورٹ میں بھی چیلنج کیا تھا، جہاں ان کے خلاف کارروائی کے حوالے سے عبوری ریلیف دیا گیا۔

مارچ 2025 میں علیمہ خان ایک مرتبہ پھر سوشل میڈیا پر منفی پروپیگنڈے کی تحقیقات کرنے والی مشترکہ تحقیقاتی ٹیم کے سامنے پیش ہوئیں۔ انصار عباسی سمیت مختلف صحافیوں کی اس وقت کی رپورٹس کے مطابق ان سے عمران خان کے ذاتی سوشل میڈیا اکاؤنٹس اور تحریک انصاف کے آفیشل پلیٹ فارمز کے بارے میں کئی گھنٹے پوچھ گچھ کی گئی۔ اسی دوران یہ دعویٰ بھی سامنے آیا کہ عمران خان، پی ٹی آئی اور پی ٹی آئی آفیشل کے بڑے سوشل میڈیا اکاؤنٹس بیرون ملک سے آپریٹ کیے جا رہے ہیں اور ان کے ذریعے بانی پی ٹی آئی کا پیغام سوشل میڈیا پر پھیلایا جاتا ہے۔ علیمہ خان سے اس نظام اور اس کے منتظمین کے بارے میں بھی سوالات کیے گئے تھے۔

کیا عمران نے اسٹیبلشمنٹ کے سامنے گھٹنے ٹیک دیے؟

ماضی میں علیمہ خان کے خلاف انکوائری کے وقت یہ الزام عائد کیا گیا تھا کہ تحریک انصاف کے تین بڑے سوشل میڈیا اکاؤنٹس کا انتظام بیرون ملک موجود افراد کے ہاتھ میں ہے اور علیمہ خان ان افراد کے ساتھ رابطے میں رہتی ہیں۔ رپورٹ میں جبران الیاس، اظہر مشوانی اور علی ملک کے نام بھی سامنے آئے تھے۔ انصار عباسی کے مطابق علیمہ خان کے ذریعے خان کے پیغامات ان اکاؤنٹس تک پہنچائے جاتے ہیں اور پارٹی کا سوشل میڈیا بیانیہ تشکیل دینے میں یہ نیٹ ورک اہم کردار ادا کرتا ہے۔ تاہم علیمہ خان نے مبینہ طور پر جے آئی ٹی کو بتایا تھا کہ عمران خان کا اکاؤنٹ بیرون ملک سے آپریٹ ہوتا ہے اور انہیں اس کے انتظامی معاملات کا علم نہیں۔ یہ تمام الزامات اور تفتیشی ذرائع کے دعوے ہیں، جنہیں کسی عدالتی فیصلے سے ثابت شدہ حقیقت قرار نہیں دیا جا سکتا۔

جولائی 2025 میں بھی نیشنل سائبر کرائم انویسٹی گیشن ایجنسی نے علیمہ خان کو ریاست مخالف سوشل میڈیا سرگرمیوں سے متعلق ایک نئی انکوائری میں طلب کیا تھا۔ اس طرح ان کے خلاف مختلف اوقات میں ایف آئی اے، کاؤنٹر ٹیررازم ونگ اور جے آئی ٹی کی سطح پر تحقیقات اور پوچھ گچھ کا سلسلہ جاری رہا۔ اندرونی معاملات سے واقف حلقوں کے مطابق علیمہ خان کے معاملے میں بنیادی اختلاف صرف ان کے ذاتی بیانات کا نہیں بلکہ اس سوشل میڈیا نظام کا بھی ہے جس کے ذریعے بیرون ملک سے تحریک انصاف کا سیاسی بیانیہ چلایا جاتا ہے۔ ان حلقوں کا دعویٰ ہے کہ جب تک اس نیٹ ورک کی جانب سے اسٹیبلشمنٹ کے خلاف جھوٹے اور گمراہ کن پروپیگنڈے کا سلسلہ بند نہیں ہوتا اور اس کے طرزِ عمل میں بہتری نہیں آتی، علیمہ خان کی رہائی کا معاملہ بھی لٹک سکتا ہے۔ ان کے مطابق دونوں بہنوں کی رہائی کے لیے یقین دہانی کافی سمجھی گئی، لیکن علیمہ خان کے معاملے میں حکام کی تشویش کا دائرہ اس سوشل میڈیا نیٹ ورک تک پھیلا ہوا ہے جسے تحریک انصاف کے بیرون ملک موجود کارکن چلاتے ہیں۔