سینئرلیگی رہنماکانوازشریف کوخط،شکایات کےانبارلگادیئے
مسلم لیگ ن کا اجلاس نہ بلانےپرسینئرلیگی رہنماکاصدرمسلم لیگ ن نوازشریف کو خط،شکایات کے انبار لگادیئے۔
مسلم لیگ (ن)کےمرکزی سینئر نائب صدر سید شاہ محمد شاہ نےطویل عرصہ سے پارٹی کااجلاس طلب نہ کرنے پر نواز شریف کو خط میں لکھا کہ آپ کے صدر بننےکےبعداجلاس طلب نہیں کیا گیا اور پارٹی کہیں نظر نہیں آرہی ہے۔
سینرلیگی رہنما نے کہا کہ میری تجویز ہے کہ ملک کی سیاسی صورت حال، مہنگائی، بے روزگاری اور دہشت گردی کےحوالےسےپارٹی میں مشاورت کی ضرورت ہے جبکہ ہم ملک کو اداروں کے ذریعے چلاناچاہتے ہیں حالانکہ مقننہ، عدلیہ اور انتظامیہ کو اپنی اپنی حدود میں رہ کر کام کرنا چاہیے۔
شاہ محمد شاہ نے کہا کہ پارٹی میں بھی اسی طرح کام چلنا چاہیے، پارٹی بھی اداروں کےبغیر نہیں چل سکتی اورپارٹی میں سی ای سی،مرکرزی ورکنگ کمیٹی سمیت سب ادارےموجود ہیں،اس کےباوجود کسی بھی ادارےکااجلاس بلانےکی ضرورت محسوس نہیں کی گئی۔
خط میں لکھا کہ ملک کی تمام ترجمہوری جماعتیں اپنے اداروں کےاجلاس منعقد کرتی رہی ہیں، ان حالات میں پارٹی اگرکوئی رہنمائی نہیں کرے گی تو کارکنان مایوسی کا شکار ہوں گے۔
نواز شریف سےسینئر رہنمانےکہا کہ ن لیگ پرعوام کا اعتماد ہے، اس وقت آپ پر اہم ذمہ داری ہےکہ آپ پارٹی کومتحرک کریں،حکومت بھی پارٹی کی رہنمائی میں چلنی چاہیے،حکومت پارٹی کےماتحت ہوتی ہےمگربدقسمتی سے اس وقت پارٹی نظر نہیں آرہی ہےاورعملاً اس وقت ملک بیوروکریسی کےمرہون منت ہے۔
سید شاہ محمد شاہ نےکہا کہ محمود خان اچکزئی اوراخترمینگل جیسے لوگ آپ سے ناراض ہیں، اس پر کوئی توجہ نہیں دی جا رہی ہے۔
سینئر نائب صدر نےکہا کہ سندھ میں نہریں نکالنے پر سندھ کے عوام میں تشویش پائی جاتی ہے،اگر ہم ان مسائل سے لاتعلق رہیں گے تو ہم تاریخ کے مجرموں کے کٹہرے میں کھڑےہوں گے،پاکستان کی فیڈریشن کو بچانے کے لیے مسلم لیگ(ن) کو فعال کردار ادا کرنا چاہیے،جس کی رہنمائی آپ کو کرنی ہے۔
