ملک سے دہشت گردی کے خاتمے کیلئےپرعزم ہیں،وزیراعظم

وزیراعظم شہبازشریف کاکہنا ہے کہ دہشت گردی کے خاتمے کیلئے پرعزم ہیں،پوری قوم سکیورٹی فورسز کے ساتھ کھڑی ہے۔

وزیراعظم شہباز شریف نےضلع لکی مروت، ضلع کرک اورخیبر میں فتنتہ الخوارج کے دہشت گردوں کیخلاف کامیاب کارروائیوں پر سکیورٹی فورسز کو خراج تحسین کیا ہے۔

شہبازشریف نے آپریشنز میں ان کارروائیوں میں مجموعی طور پر 30 خوارجی دہشت گردوں کو ہلاک کرنے پر سیکیورٹی فورسز کی ستائش کی۔

وزیراعظم  نے کہا کہ دہشت گردی کیخلاف جنگ میں  قوم سکیورٹی فورسز کے ساتھ کھڑی ہے، ملک سے ہر قسم کی دہشت گردی کے مکمل خاتمے کیلئےپرعزم ہیں۔

واضح رہے کہ گزشتہ روز سیکیورٹی فورسز نے خیبرپختونخوا میں3 علیحدہ علیحدہ کارروائیوں میں 30 خوارج کو ہلاک کردیا تھا۔

آئی ایس پی آرکے مطابق 24 اور 25 جنوری کو خیبر پختونخوا کےمختلف علاقوں میں تین الگ الگ کارروائیوں کے دوران سیکیورٹی فورسز نے 30 خوارج کو ہلاک کر دیا۔مروت میں خوارج کی موجودگی کی اطلاع پر انٹیلیجنس کی بنیاد پر ایک آپریشن کیا گیا۔سکیورٹی فورسز نے خوارج کے ٹھکانوں کو مؤثر انداز میں نشانہ بنایا اور 18 خوارج کو ہلاک جبکہ 6 کو زخمی حالت میں گرفتار کرلیا۔

دوسری انٹیلی جنس کارروائی ضلع کرک میں کی گئی جہاں فائرنگ کے تبادلے میں 8 خوارج ہلاک ہوئے اس کے علاوہ تیسری جھڑپ خیبر ضلع کے عمومی علاقے باغ میں ہوئی، جہاں  سیکیورٹی فورسز نے4 خوارج کو ہلاک کر دیا۔

باغ میں دو طرفہ فائرنگ کے نتیجے میں ہلاک ہونےوالوں میں خارجی رہنما عزیز الرحمن عرف قاری اسماعیل اور خارجی مخلص بھی شامل تھے، جبکہ 2 خوارج زخمی ہوئے۔ہلاک ہونےوالےخوارج کے قبضے سےاسلحہ اور گولہ بارود بھی برآمد کیا گیا جبکہ مارے جانےوالے دہشت گرد معصوم شہریوں کے قتل میں ملوث تھے۔

علاقے میں کسی بھی باقی ماندہ خوارج کو ختم کرنے کیلئےکلیرنس آپریشن جاری ہیں، پاک فوج دہشت گردی کے ناسور کو ملک سے مکمل طور پر ختم کرنے کے لیے پرعزم ہے۔