9 مئی مقدمات: شاہ محمود بری، یاسمین راشد سمیت دیگر کو 10، 10 سال کی سزا
لاہور کی انسداد دہشت گردی عدالت نے سانحہ 9 مئی کے دو مقدمات کا فیصلہ سناتے ہوئے پی ٹی آئی کے سینئر رہنما شاہ محمود قریشی کو بری کردیا۔جب کہ ڈاکٹر یاسمین راشد اور اعجاز چوہدری سمیت دیگر ملزمان کو 10، 10 برس قید کی سزا سنادی۔
انسداد دہشت گردی عدالت لاہور کے جج منظر علی گل نے تھانہ شادمان نذر آتش کیس اور گاڑیاں جلانے کے کیس کا فیصلہ سنایا ۔
عدالت نے پی ٹی آئی کے رہنماؤں محمود الرشید، ڈاکٹر یاسمین راشد، عمر سرفراز چیمہ اور اعجاز چوہدری کو 10، 10 سال قید کی سزا سنائی۔
عائشہ بھٹہ کو جناح ہاؤس کے قریب گاڑیاں جلانے کےمقدمہ میں 10 سال قید کی سزا سنائی گئی جب کہ تھانہ شادمان کو آگ لگانے کےکیس میں 12 ملزمان کو بری کردیا گیا۔رفیع الدین، فرید خان، سہیل خان، اویس، عبدالقادر، سلمان احمد، فیضان، سلطان، شاہد بیگ، طیب، ماجد علی، بخت روان کو بری کیا گیا۔
عدالت نے عالیہ حمزہ ملک اور صنم جاوید کو 5 ، 5 سال قید کی سزا سنائی۔
یاد رہےکہ چند روز قبل انسداد دہشت گردی عدالت نے عمر ایوب،شبلی فراز سمیت دیگر افراد کو بھی 9 مئی جلاؤ گھیراؤ کے مقدمات میں سزائیں سنائی تھیں۔
