26 نومبر احتجاج کیس: علیمہ خان کے چوتھی بار ناقابل ضمانت وارنٹ گرفتاری جاری
راولپنڈی کی انسدادِ دہشت گردی عدالت (اے ٹی سی) نے 26 نومبر احتجاج کیس میں عدم پیشی پر علیمہ خان کے ایک بار پھر ناقابلِ ضمانت گرفتاری وارنٹ جاری کر دیے۔
26 نومبر احتجاج کیس کی سماعت انسداد دہشت گردی عدالت راولپنڈی کے جج امجد علی شاہ نے کی، علیمہ خان ناقابلِ ضمانت وارنٹ کے باوجود عدالت میں پیش نہ ہوئیں، جب کہ دیگر 10 ملزمان عدالت میں موجود تھے۔
عدالت نے علیمہ خان کی غیرحاضری پر ایک لاکھ روپے کے ضمانتی مچلکے بحقِ سرکار ضبط کرنے کا حکم دیتےہوئے ضامن عمر شریف کو شوکاز نوٹس جاری کردیا۔ عدالت نے ضامن کو 24 اکتوبر تک جواب جمع کرانے کی ہدایت کی اور علیمہ خان کو 10، 10 لاکھ روپے کے دو نئے ضمانتی مچلکے جمع کرانے کے احکامات جاری کیے۔
عدالت نے ایس پی راول محمد سعد اور ڈی ایس پی نعیم کو بھی شوکاز نوٹس جاری کرتےہوئے علیمہ خان کے روپوش ہونے سے متعلق پولیس رپورٹ کو بوگس قراردیا اور دونوں افسران کو 24 اکتوبر کو ذاتی حیثیت میں طلب کر لیا۔
عدالت نے ریمارکس دیے کہ اگر علیمہ خان روپوش ہیں تو اڈیالہ جیل کے باہر ان کی میڈیا ٹاک کیسے نشر ہوتی ہیں۔عدالت نے مقدمے میں شامل چار گاڑیوں کے 85 لاکھ روپے کے شیورٹی بانڈز بھی ضبط کرلیے۔ یہ گاڑیاں مالکان کو عدالت سے سپرداری پر ملی ہوئی تھیں۔
عدالت نے آئی جی خیبرپختونخوا اور آئی جی بلوچستان کو گاڑیاں ضبط کرکے عدالت پیش کرنے کا حکم دیا۔مقدمے کی مزید سماعت 24 اکتوبر تک ملتوی کردی گئی۔
