پاکستان اور ایران کا دفاعی امورپربراہ راست مشاورت کافیصلہ
پاکستان اور ایران نے رواں ہفتے خارجہ پالیسی، دفاعی امور اور علاقائی صورتحال پر براہ راست دو طرفہ مشاورت کا فیصلہ کیا ہے۔ یہ مشاورت آذربائیجان میں ہونے والے اقتصادی تعاون تنظیم کے سربراہی اجلاس کے موقع پر ہوگی۔
ذرائع کے مطابق نائب وزیراعظم اور وزیر خارجہ اسحاق ڈار ایرانی وزیر خارجہ سے اہم ملاقات کریں گے، جبکہ وزیراعظم شہباز شریف کی ایرانی صدر مسعود پزشکیان سے ملاقات جمعہ کے روز متوقع ہے۔
پاکستانی وفد جمعرات کے روز آذربائیجان کے تاریخی شہر شوشا پہنچے گا، جہاں اقتصادی تعاون تنظیم کااجلاس منعقد ہو رہا ہے۔ شوشا، کاراباخ کا ایک اسٹریٹجک علاقہ ہے، جو حالیہ برسوں میں آرمینیا سے آزاد کرایا گیا تھا۔
اس موقع پر اسحاق ڈار ترک وزیر خارجہ حقان فدان، قازقستان، ازبکستان اور دیگر رکن ممالک کے وزرائے خارجہ سے بھی دو طرفہ ملاقاتیں کریں گے۔
علاوہ ازیں پاکستانی وفد کی ترک صدر رجب طیب اردوان، آذربائیجان کے صدر الہام علییف اور دیگر علاقائی رہنماؤں سے ملاقاتیں بھی متوقع ہیں، جن میں باہمی تعاون اور خطے کی مجموعی صورتحال پر تبادلہ خیال ہوگا۔
