پاکستانی باکسر کی بھارتی حریف کو شکست ، صدر زرداری کی مبارکباد

صدرِ پاکستان آصف علی زرداری نے پاکستانی باکسر سمیر خان کو یوتھ ورلڈ بینٹم ویٹ ٹائٹل جیتنے پر مبارکباد دیتے ہوئے اسے پاکستان کے لیے ایک تاریخی کامیابی قرار دیا ہے۔

اپنے تہنیتی پیغام میں صدر زرداری نے کہا "پاکستان نے پہلی بار یوتھ ورلڈ بینٹم ویٹ ٹائٹل اپنے نام کیا، یہ پوری قوم کے لیے فخر کا لمحہ ہے۔ سمیر خان نے عالمی سطح پر پاکستان کا نام روشن کیا ہے۔”

صدر نے نوجوان باکسر کی محنت، عزم اور جذبے کو سراہتے ہوئے کہا کہ سمیر خان پاکستانی نوجوانوں کے لیے ایک مثالی رول ماڈل ہیں۔

واضح رہے کہ تھائی لینڈ میں ہونے والے یوتھ ورلڈ بینٹم ویٹ چیمپئن شپ کے فائنل میں سمیر خان نے بھارتی باکسر بنٹی سنگھ کو شکست دے کر ٹائٹل اپنے نام کیا۔

مقابلے کے بعد سمیر خان نے کہا "یہ جیت میں پوری پاکستانی قوم، پاک فوج اور تمام شہیدوں کے نام کرتا ہوں۔”