وزیراعظم اور مولانا فضل الرحمان کا ٹیلی فونک رابطہ، پاک سعودیہ معاہدے پر تبادلہ خیال
وزیر اعظم شہباز شریف اور سربراہ جمعیت علماء اسلام (جے یو آئی ف) مولانا فضل الرحمان کے درمیان ٹیلی فونک رابطہ ہوا ہے، جس میں دونوں رہنماؤں نے پاکستان اور سعودی عرب کے مابین دفاعی معاہدے پر تبادلہ خیال کیا۔
وزیراعظم آفس سے جاری اعلامیے کے مطابق مولانا فضل الرحمان نے پاک سعودی معاہدے کو تاریخی قرار دیتے ہوئے اسے سراہا اور کہا کہ پاکستان کو حرمین شریفین کی حفاظت کی سعادت نصیب ہونا قابل مسرت ہے۔
دونوں رہنماؤں نے مشرق وسطیٰ اور غزہ کی صورت حال پر بھی گفتگو کی اور غزہ میں مستقل امن اور پاکستان کے امن کی کوششوں میں اہم کردار پر بھی تبادلہ خیال کیا۔
دونوں رہنماؤں نے غزہ میں جنگ بندی پر حماس کے بیان کو خطے میں امن کی راہ ہموار کرنےکا موقع قراردیا اور حماس کے جنگ بندی کےبیان کو فلسطینیوں کی نسل کشی روکنےکا نادر موقع بھی قرار دیا۔
بھارتی قیادت کے اشتعال انگیز بیانات قابلِ تشویش ہیں : آئی ایس پی آر
وزیراعظم شہباز شریف کا کہنا تھاکہ پاکستان فلسطینیوں کے حقوق کےلیے ساتھ دیتا رہےگا،غزہ میں جنگ بندی سے فلسطینیوں کے قتل عام کی روک تھام ہوگی اور فلسطینی ریاست کے قیام کا دیرینہ خواب پایہ تکمیل کو پہنچے گا۔مشرق وسطیٰ میں امن خطے کے لوگوں کی ترقی و خوش حالی کےلیے انتہائی اہمیت کا حامل ہے۔
