وزیراعظم نے "نشانِ پاکستان” لینے سے انکار کر دیا
یومِ آزادی کے موقع پر ایوانِ صدر اسلام آباد میں ہونے والی ایک باوقار تقریب میں صدرِ مملکت آصف علی زرداری نے سول اور عسکری قیادت کو اعلیٰ قومی اعزازات سے نوازا۔ ذرائع کے مطابق، سول و ملٹری ایوارڈز کمیٹی نے وزیراعظم شہباز شریف کا نام ملک کے اعلیٰ ترین سول اعزاز "نشانِ پاکستان” کے لیے تجویز کیا تھا، تاہم وزیراعظم نے ذاتی طور پر اپنا نام فہرست سے نکالنے کی ہدایت دیتے ہوئے باقی تمام ناموں کی منظوری دے دی۔
تقریب میں وزیر خارجہ اسحاق ڈار، چیئرمین پیپلز پارٹی اور پارلیمانی کمیٹی کے سربراہ بلاول بھٹو زرداری، وزیر قانون اعظم نذیر تارڑ، وزیر دفاع خواجہ آصف اور وزیراعظم کے مشیر رانا ثناء اللہ کو نشانِ امتیاز سے نوازا گیا۔ اس کے علاوہ وزیر اطلاعات عطا اللہ تارڑ، وزیر داخلہ محسن نقوی، احسن اقبال، شیری رحمان، فیصل سبزواری، مصدق ملک، حنا ربانی کھر، طارق فاطمی اور خرم دستگیر خان کو بھی اعلیٰ سول اعزازات سے سرفراز کیا گیا۔
فوجی قیادت میں، فیلڈ مارشل و آرمی چیف جنرل عاصم منیر کو "معرکۂ حق” میں دشمن کے خلاف مؤثر حکمت عملی اور فرنٹ لائن قیادت پر ہلالِ جُرات، جبکہ ائیر چیف مارشل ظہیر احمد بابر سدھو کو ہلالِ امتیاز (ملٹری) دیا گیا۔
دوسری جانب سینئر صحافی انصار عباسی نے "معرکۂ حق ایوارڈ” وصول کرنے سے معذرت کرتے ہوئے کابینہ سیکریٹری کو تحریری طور پر آگاہ کیا کہ یہ اعزاز دراصل پوری قوم کا حق ہے، کیونکہ انہوں نے صرف اپنا پیشہ ورانہ فرض نبھایا اور کوئی غیر معمولی کارنامہ انجام نہیں دیا۔
