وزیراعظم کی ایرانی سفارتخانے آمد،آیت اللہ خامنہ ای کیلئےنیک خواہشات کااظہار
وزیراعظم شہبازشریف کی ایرانی سفارتخانےآمد،اسرائیلی جارحیت میں شہید ہونےوالوں کیلئےفاتحہ خوانی کی ،سپریم لیڈرآیت اللہ خامنہ ای کیلئےنیک خواہشات کااظہارکیا۔
وزیراعظم شہباز شریف نے اسلام آباد میں اسلامی جمہوریہ ایران کے سفارت خانے کا دورہ کیا، جہاں انہوں نے حالیہ اسرائیلی جارحیت کے دوران شہید اور زخمی ہونے والے ایرانی شہریوں کی یاد میں رکھی گئی تعزیتی کتاب میں اپنے تاثرات درج کیے۔
وزیراعظم آفس سے جاری بیان کے مطابق ان کے ہمراہ نائب وزیراعظم و وزیر خارجہ محمد اسحاق ڈار، وزیراعظم کے مشیر طارق فاطمی اور سیکریٹری خارجہ بھی موجود تھے۔
سفارت خانے پہنچنے پر پاکستان میں تعینات ایرانی سفیر رضا امیری مقدم اور سفارت خانے کے سینئر حکام نے وزیراعظم کا پرتپاک استقبال کیا۔ وزیراعظم نے اس موقع پر ایران کے عوام اور حکومت کے ساتھ دلی ہمدردی اور یکجہتی کا اظہار کیا۔
انہوں نے ایرانی قوم کی استقامت، صبر اور حوصلے کو خراج تحسین پیش کرتے ہوئے شہداء کے لیے دعائے مغفرت اور زخمیوں کی جلد صحتیابی کی دعا کی۔
وزیراعظم نے ایرانی سپریم لیڈر آیت اللہ علی خامنہ ای اور نومنتخب صدر ڈاکٹر مسعود پیزشکیان کے لیے نیک تمناؤں کا اظہار کرتے ہوئے پاکستان کی جانب سے ایران کو مسلسل حمایت کی یقین دہانی بھی کرائی۔
