9 مئی کے کیسز میں قید پی ٹی آئی رہنماؤں کی مذاکرات کی اپیل

سانحہ9مئی کے بعد جیلوں میں قید تحریک انصاف کے رہنماؤں نے قیادت کو حکومت کے ساتھ مذاکرات کی تجویز دیدی۔

شاہ محمودقریشی سمیت تحریک انصاف کے اسیررہنماؤں نے قیادت کو خط ارسال کردیا حکومت سے مذاکرا ت کامشورہ دیاگیا اور یہ بھی کہا گیا کہ مذاکرات کو بانی پی ٹی آئی عمران خان کی اجازت سے مشروط کیا جائے۔

تحریک انصاف کے سینئر نائب صدر شاہ محمود قریشی، اور سابق وزرا میاں محمود الرشید، ڈاکٹر یاسمین راشد،

اعجاز چوہدری اور عمر سرفراز چیمہ کی جانب سے ایک اہم خط تحریر کیا گیا ہے۔

خط میں کہا گیا ہے کہ ملک کو درپیش بدترین سیاسی بحران سے نکلنے کا واحد راستہ مذاکرات ہیں، جو ہر سطح پر ناگزیر ہو چکے ہیں۔ مصنفین کا کہنا ہے کہ مذاکرات صرف سیاسی جماعتوں کے درمیان ہی نہیں، بلکہ مقتدر حلقوں کے ساتھ بھی ضروری ہیں۔

خط میں تجویز دی گئی ہے کہ مذاکرات کا آغاز سیاسی سطح سے کیا جائے اور لاہور کی جیلوں میں قید پی ٹی آئی کے رہنماؤں کو بھی اس عمل میں شامل کیا جائے۔

مزید کہا گیا ہے کہ مذاکراتی کمیٹی کی تشکیل کے لیے چیئرمین تحریک انصاف عمران خان تک رسائی کو ممکن بنایا جائے تاکہ قیادت مشاورت کے بعد فیصلہ کر سکے۔ ساتھ ہی ملاقاتوں کے اس سلسلے کو مستقل بنیادوں پر جاری رکھنے پر زور دیا گیا ہے۔