پی ایس ایل،کراچی کنگزپشاور زلمی کوہراکرپلےآف مرحلے میں پہنچ گئی
پی ایس ایل10کے27ویں میچ میں کراچی کنگزنے پشاور زلمی کو23رنزسےشکست دے کر پلے آف مرحلےکیلئےکوالیفائی کرلیا۔
پشاو رزلمی کی ٹیم 238رنزہدف کے تعاقب میں مقررہ20اوورز میں 5وکٹوں کے نقصان پرصرف214 رنزبناسکی۔
بھارتی جارحیت کے سبب حالات کشیدہ ہونے کی وجہ سے التواء کا شکار ہونے والی لیگ کا راولپنڈی کرکٹ اسٹیڈیم میں دھواں دار انداز دوبارہ آغاز ہوا۔
راولپنڈی کرکٹ سٹیڈیم میں کھیلےجارہے میچ میں کراچی کنگزنےمقررہ20اوور میں 4وکٹوں کے نقصان پر 237رنزبنائے اور پشاور زلمی کو جیت کیلئے238رنزکاٹارگٹ دیاتھا۔
پی ایس ایل 10 کے 27ویں میچ میں پشاور زلمی کے کپتان بابراعظم نے ٹاس جیت کر کراچی کنگز کو بیٹنگ کی دعوت دی۔
کراچی کنگز کی جانب سے اننگز کا آغاز کرنے والے بین میک ڈرموٹ کھاتہ کھولے بغیر ہی پویلین واپس لوٹ گئے۔ تاہم، کپتان ڈیوڈ وارنر اور جیمز ونس نے 162 رنز کی شاندار شراکت قائم کی۔ڈیوڈ وارنر نے 50 گیندوں پر 86 رنز کی اننگز کھیلی جس میں 2 چھکے اور 11 چوکے شامل تھے، جیمز ونس نے 1 چھکے اور 11 چوکوں کی مدد سے 42 گیندوں پر 72 رنز بنائے۔عرفان خان نیازی 2 رنز بناکر آؤٹ ہوئے، خوشدل شاہ نے 15 گیندوں پر 43 رنز کی اننگز کھیلی جس میں 3 چھکے اور 4 چوکے شامل تھے وہ محمد نبی کے ساتھ ناٹ آؤٹ واپس آئے، نبی نے 10 گیندوں پر 26 رنز بنائے۔پشاور زلمی کی جانب سے لک ووڈ 2، علی رضا اور عارف یعقوب ایک ایک وکٹ حاسل کرنے میں کامیاب رہے۔
راولپنڈی کرکٹ اسٹیڈیم میں لیگ کے آخری 4 میچز کھیلے جائیں گے جب کہ قذافی اسٹیڈیم لاہور پلے آف مرحلے کی میزبانی کرے گا جس میں فائنل بھی شامل ہے۔
پشاور زلمی کے سکواڈ میں محمد حارث (وکٹ کیپر)،صائم ایوب، بابر عظم (کپتان)، ٹوم کوہلر کیڈمور، حسین طلعت، میکس برائنٹ، معاذ صداقت، لیوک ووڈ، احمد دانیال، عارف یعقوب، علی رضا شامل ہیں۔
کراچی کنگز کے سکواڈ میں ڈیوڈ وارنر(کپتان)، بین میکڈرموٹ، جیمز ونس، سعد بیگ (وکٹ کیپر)، خوشدل شاہ، عرفان خان نیازی، محمد نبی، عامر جمال، عباس آفریدی، حسن علی اور میر حمزہ شامل ہیں۔
رواں ٹورنامنٹ میں کراچی کنگز آٹھ میچز کھیل چکی ہے جس میں سے اسے پانچ میں کامیابی ملی جبکہ تین میں شکست ہوئی۔اسی طرح سے پشاور زلمی نے چار میچز میں فتح حاصل کی جبکہ چار میں ناکامی کا سامنا کرنا پڑا۔
پی ایس ایل کے پوائنٹس ٹیبل پر کوئٹہ گلیڈی ایٹرز 13 پوائنٹس کے ساتھ پہلے نمبر پر ہے جبکہ کراچی کنگز 10 پوائنٹس کے ساتھ دوسرے اور اسلام آباد یونائیٹڈ 10 پوائنٹس کے ساتھ تیسرے نمبر پر ہے۔لاہور قلندرز کا نو پوائنٹس کے ساتھ چوتھا نمبر ہے جبکہ پشاور زلمی آٹھ پوائنٹس کے ساتھ پانچویں نمبر پر ہے۔ملتان سلطانز دو پوائنٹس کے ساتھ پی ایس ایل کے پوائنٹس ٹیبل پر آخری نمبر پر ہے۔
