سعودی مفتیِ اعظم شیخ عبدالعزیز بن عبداللہ آل الشیخ انتقال کر گئے
سعودی عرب کے ممتاز مذہبی رہنما اور مفتیِ اعظم، شیخ عبدالعزیز بن عبداللہ بن محمد آل الشیخ آج انتقال کر گئے۔ ان کے انتقال کی اطلاع سعودی پریس ایجنسی (ایس پی اے) نے شاہی دیوان کے اعلامیے کے ذریعے دی۔
مرحوم شیخ عبدالعزیز، سعودی عرب کی ہیئتِ کبار العلماء، علمی تحقیقات و افتا کی عمومی صدارت، اور مسلم ورلڈ لیگ کی اعلیٰ کونسل کے سربراہ کے طور پر اہم ذمہ داریاں نبھا رہے تھے۔
نمازِ جنازہ آج عصر کی نماز کے بعد ریاض کی امام ترکی بن عبداللہ مسجد میں ادا کی جائے گی۔ خادمِ حرمین شریفین شاہ سلمان بن عبدالعزیز آل سعود کی ہدایت پر ان کی غائبانہ نمازِ جنازہ مسجد الحرام (مکہ مکرمہ)، مسجد نبوی (مدینہ منورہ)، اور مملکت کی تمام مساجد میں عصر کے بعد ادا کی جائے گی۔
شاہی دیوان نے اپنے بیان میں کہا کہ شیخ عبدالعزیز کے انتقال سے سعودی عرب اور اسلامی دنیا ایک جلیل القدر عالم دین سے محروم ہو گئی ہے، جنہوں نے طویل عرصے تک اسلام اور مسلمانوں کی خدمت میں نمایاں کردار ادا کیا۔
خادمِ حرمین شریفین شاہ سلمان بن عبدالعزیز اور ولی عہد و وزیراعظم شہزادہ محمد بن سلمان نے مرحوم کے اہلِ خانہ، سعودی عوام اور پوری امتِ مسلمہ سے گہرے رنج و غم کا اظہار کرتے ہوئے تعزیت پیش کی ہے۔
شیخ عبدالعزیز بطور مفتیِ اعظم سعودی عرب میں مذہبی اختیارات کے اعلیٰ ترین منصب پر فائز تھے۔ وہ سلفی مکتب فکر کے عالمی سطح پر بااثر رہنما تصور کیے جاتے تھے اور ان کا تعلق سعودی عرب کے معروف آل الشیخ خاندان سے تھا، جو محمد بن عبدالوہاب کی نسل سے ہیں اور دو صدیوں سے آل سعود خاندان کے ساتھ قریبی تعلقات میں رہے ہیں۔
