آزادکشمیرمیں حکومت سازی،شہبازشریف نے کمیٹی تشکیل دیدی
پیپلزپارٹی کی جانب سے حکومت بنانےکےاعلان کے بعد وزیراعظم شہباز شریف نے آزاد کشمیر میں حکومت سازی کیلئےکمیٹی تشکیل دیدی۔
ذرائع کے مطابق وزیراعظم شہباز شریف نےآزاد کشمیر میں حکومت سازی اور دیگر سیاسی معاملات کی نگرانی کیلئے وفاقی وزیر احسن اقبال، مشیر رانا ثنااللہ اور وفاقی وزیر امیر مقام پر مشتمل کمیٹی تشکیل دی ہے۔
ذرائع کے مطابق کمیٹی آزادکشمیر میں حکومت سازی اور دیگر سیاسی معاملات کو دیکھے گی اور اس بات کا جائزہ لے گی کہ آیا پیپلز پارٹی کے پاس حکومت بنانے کیلئےنمبرز پورے ہیں؟
ذرائع کے مطابق کمیٹی پیپلزپارٹی کی جانب سے آزاد کشمیرمیں حکومت سازی سے متعلق اموردیکھے گی، کمیٹی تمام تر صورتحال پر وزیراعظم کو بریف کرے گی۔
یاد رہے کہ پیپلزپارٹی نےگذشتہ روزآزاد کشمیرمیں حکومت بنانےکا اعلان کیا تھا۔
پیپلزپارٹی نے گزشتہ روز سماجی رابطے کی ویب سائٹ فیس بک پر پوسٹ کیا تھا کہ آزاد کشمیر پیپلز پارٹی کے رہنماؤں نے صدر مملکت آصف علی زرداری سے ملاقات کی تھی اور آزاد کشمیر میں حکمرانی اور پارٹی کے کردار سے متعلق امور پر تبادلہ خیال کیا تھا۔
چیئرمین پیپلز پارٹی بلاول بھٹو زرداری، خواتین ونگ کی صدر فریال تالپور اور دیگر سینئر رہنما بھی موجود تھے۔
اس سے پہلے اجلاس کا پہلا سیشن چیئرمین بلاول بھٹو کی زیر صدارت ہوا، اجلاس میں موجودہ وزیراعظم انوارالحق کو عہدے سے ہٹانے اور نئی حکومت بنانے سے متعلق حکمت عملی طے کی گئی۔
