عمران خان سے ملاقاتوں پرپابندی کیخلاف درخواست سماعت کیلئےمقرر
سپریم کورٹ نے بانی پی ٹی آئی عمران خان سے ملاقاتوں پر عائد پابندی کے خلاف دائر درخواستوں کو باقاعدہ سماعت کے لیے مقرر کر دیا ہے۔
جسٹس محمد علی مظہر کی سربراہی میں سپریم کورٹ کا تین رکنی بینچ 20 جولائی کو کیس کی سماعت کرے گا، جس میں درخواست گزاروں کے مؤقف اور متعلقہ حکام کے جوابات کا جائزہ لیا جائے گا۔
یاد رہے کہ وکیل مشال یوسفزئی اور عظمیٰ خان نے بانی پی ٹی آئی سے ملاقات کی اجازت نہ ملنے کے خلاف سپریم کورٹ سے رجوع کرتے ہوئے مؤقف اختیار کیا ہے کہ انہیں قانونی اور آئینی حقوق کے تحت اپنے مؤکل سے ملاقات کی اجازت دی جائے۔
گزشتہ سماعت کے دوران سپریم کورٹ نے سپرنٹنڈنٹ اڈیالہ جیل اور ایڈووکیٹ جنرل اسلام آباد کو نوٹس جاری کرتے ہوئے تفصیلی جواب طلب کیا تھا۔ عدالت نے متعلقہ حکام کو ہدایت کی تھی کہ ملاقاتوں پر عائد پابندی کی وجوہات اور قانونی بنیاد سے آگاہ کیا جائے۔
آئندہ سماعت میں عدالت اس بات کا جائزہ لے گی کہ ملاقاتوں پر عائد پابندی قانون اور جیل قواعد کے مطابق ہے یا نہیں، جبکہ فریقین کے دلائل سننے کے بعد مزید کارروائی سے متعلق فیصلہ کیا جائے گا۔ اس کیس کو قانونی حلقوں میں اہمیت دی جا رہی ہے کیونکہ اس کے نتائج جیل میں قید ملزمان سے ملاقاتوں کے طریقہ کار اور قانونی حقوق سے متعلق مستقبل کی عدالتی رہنمائی پر بھی اثرانداز ہو سکتے ہیں۔
