کوشش ہے ٹیکس نیٹ میں اضافہ کیا جائے : احسن اقبال
وفاقی وزیر منصوبہ بندی احسن اقبال کا کہنا ہے کہ کوشش ہے ٹیکس نیٹ میں اضافہ کیا جائے کیوں کہ ہم مفت میں حکومت نہیں چلاسکتے۔
سینیٹ اجلاس میں وزارت منصوبہ بندی کی جانب سے پیش کیےگئے تحریری جواب بتایاگیا کہ بلوچستان میں پی ایس ڈی پی کے 1429 ارب روپے کے 200 منصوبے جاری ہیں، 30 جون 2024 تک 381.2 ارب روپے کےاخراجات ہوئے جب کہ سال 2024-25 کے دوران پی ایس ڈی پی کےلیے 130 ارب روپے مختص کیے گئے۔
اس حوالے سےوفاقی وزیر منصوبہ بندی احسن اقبال نےکہا کہ ہم اپنی قومی ذمہ داری سمجھتے ہیں کہ بلوچستان کو اس کےحصے سے زیادہ دیا جائے، 2022 میں بلوچستان کی پی ایس ڈی پی کے 84 ارب کی مختص رقم بجٹ میں بڑھا کر 126 ارب روپے کی،جب بلوچستان کا کوئی منصوبہ کمیشن میں آتا ہےتو ہم اسے تیزی سے منظور کرتےہیں۔
ٹیکس وصولیوں میں 101 ارب روپے شارٹ فال کا سامنا
وفاقی وزیر احسن اقبال نے کہاکہ وفاق کے محاصل میں 10 ہزار ارب روپیہ آتا ہے اور قرضوں کی ادائیگی بھی 10 ہزار ارب ہے،جتنا پیسہ آتا ہےسب قرض ادائیگی میں چلا جاتاہے،باقی اخراجات کےلیے قرض لینا پڑتا ہے،کوشش ہے ٹیکس نیٹ میں اضافہ کیاجائے،ہم مفت میں حکومت نہیں چلاسکتے۔
احسن اقبال کاکہنا تھا کہ وفاقی ترقیاتی بجٹ کاحجم سکڑےگا تو پھر ہر منصوبہ سست روی کا شکار ہو گا،ہم نے 2018 میں ترقیاتی بجٹ ایک ہزار ارب چھوڑا تھا جو سکڑکر 2022 میں 800 ارب رہ گیا،اسی رفتار سے کام کررہےہوتے تو آج ترقیاتی بجٹ 3000 ارب روپے ہوتا۔
