آج سال کا طویل دن اور مختصر ترین رات

دنیا بھر کی طرح پاکستان میں بھی آج سال کا طویل ترین دن اور مختصر ترین رات ہے۔

فلکیاتی حساب سے زمین کے شمالی نصف کرے میں موجود ممالک آج موسمِ گرما کے طویل ترین دن کا تجربہ کر رہے ہیں، جبکہ جنوبی نصف کرے میں آج سال کا مختصر ترین دن اور طویل ترین رات ہے، جس کے ساتھ ہی وہاں موسمِ سرما کا باقاعدہ آغاز ہو گیا ہے۔

پاکستان میں جغرافیائی مقامات کے لحاظ سے آج دن کا دورانیہ 14 سے 15 گھنٹے کے درمیان رہے گا۔

ماہرینِ فلکیات کے مطابق، یہ سلسلہ زیادہ دیر نہیں چلے گا اور یکم جولائی کے بعد سے دن کا دورانیہ بتدریج کم ہونا شروع ہو جائے گا، یہاں تک کہ 22 ستمبر کو دن اور رات کا دورانیہ ایک بار پھر تقریباً برابر ہو جائے گا۔

دنیا کا سب سے طویل دن امریکی ریاست الاسکا کے وسطی حصے میں ریکارڈ کیا جا رہا ہے، جہاں سورج کی روشنی کا دورانیہ 21 گھنٹے سے بھی زائد ہوگا۔

قطبِ جنوبی کے مرکزی مقام یعنی انٹارکٹیکا میں صورتحال بالکل برعکس ہے، جہاں سورج مکمل طور پر غائب ہے اور وہاں مسلسل 24 گھنٹے تاریکی کا راج ہے۔

دلچسپ بات یہ ہے کہ یورپی ملک سویڈ ن میں اس دن کو ایک تہوار کی طرح منایا جاتا ہے جسے ’مڈ سمر‘ کہتے ہیں۔