تھانہ شادمان،پولیس گاڑیاں جلانےکےکیس کا ٹرائل مکمل،فیصلہ محفوظ
انسداد دہشت گردی عدالت نے تھانہ شادمان اور جناح ہاؤس کے قریب پولیس گاڑیاں جلانے کے کیسز کا ٹرائل مکمل کرتے ہوئے فیصلہ محفوظ کر لیا، جو 11 اگست کو سنایا جائے گا۔
لاہور میں انسداد دہشت گردی عدالت کے جج منظر علی گل نے کوٹ لکھپت جیل میں رات گئے تک دونوں مقدمات کی سماعت کی۔ پولیس گاڑیاں جلانے کے مقدمے میں ملزمان کے صفائی بیانات اور حتمی دلائل مکمل کر لیے گئے۔
جناح ہاؤس کے قریب گاڑیاں جلانے کے کیس میں 65 سرکاری گواہوں کے بیانات پر جرح مکمل ہوئی، مقدمے میں 17 ملزمان کا ٹرائل کیا گیا، 7 کو اشتہاری قرار دیا گیا جبکہ ایک ملزم وفات پا چکا ہے۔ ملزمان میں شاہ محمود قریشی، ڈاکٹر یاسمین راشد اور عمر سرفراز چیمہ سمیت دیگر شامل ہیں۔
9 مئی کو تھانہ شادمان کو جلانے کے کیس میں پولیس نے 41 ملزمان کے خلاف چالان پیش کیا، جن میں سے 25 کا ٹرائل ہوا، 15 کو اشتہاری قرار دیا گیا اور ایک وفات پا چکا ہے۔ اس مقدمے میں 45 گواہوں نے شہادتیں ریکارڈ کروائیں۔ ملزمان میں شاہ محمود قریشی، ڈاکٹر یاسمین راشد، محمود الرشید، عمر سرفراز چیمہ، اعجاز چوہدری، عالیہ حمزہ اور صنم جاوید شامل ہیں۔
