ترکیہ نے پاکستان کوسیلاب سےنمٹنےکیلئےمددکی پیشکش کردی
جمہوریہ ترکیہ کے صدر رجب طیب ایردوان کاوزیراعظم شہبازشریف سے ٹیلیفونک رابطہ،سیلاب سےنمٹنےکیلئےمدد کی پیشکش کردی۔
وزیراعظم شہباز شریف سے جمہوریہ ترکیہ کے صدر رجب طیب ایردوان نے ٹیلی فونک رابطے میں پاکستان کے مختلف حصوں میں آنے والے حالیہ سیلاب پر گہرے دکھ اور افسوس کا اظہار کیا۔
ترک صدر نے قیمتی جانوں کے ضیاع اور بڑے پیمانے پر املاک کی تباہی پر پاکستانی عوام سے اظہارِ یکجہتی کرتے ہوئے کہا کہ ترکیہ ہر طرح کی امدادی کارروائیوں میں مکمل تعاون کے لیے تیار ہے۔
وزیراعظم شہباز شریف نے مشکل گھڑی میں ترک صدر کے جذبات اور مدد کی فراخدلانہ پیشکش پر شکریہ ادا کرتے ہوئے کہا کہ یہ رابطہ پاکستان اور ترکیہ کے درمیان دیرینہ اور برادرانہ تعلقات کا مظہر ہے۔ انہوں نے کہا کہ دونوں ممالک ہمیشہ ایک دوسرے کے شانہ بشانہ کھڑے رہے ہیں۔
مزید برآں، دونوں رہنماؤں نے اس سال کے آغاز میں ہونے والی گفتگو اور آئندہ چین کے شہر تیانجن میں شنگھائی تعاون تنظیم کے سربراہی اجلاس کے موقع پر متوقع ملاقات پر بھی تبادلہ خیال کیا۔
