اداکارہ عالیہ بھٹ کو رات بھر کس نے رلایا؟

معروف بھارتی اداکارہ عالیہ بھٹ نئی فلم ’’مسز چٹر جی بمقابلہ ناروے‘‘ سے اس قدر متاثر ہوئیں کہ رات آنسوئوں کے ساتھ گزار دی، اداکارہ نے انکشاف کیا کہ فلم دیکھنے کے بعد ان کی گزشتہ ہفتے کی رات اپنی والدہ اور بہن کے ساتھ روتے ہوئے گزری۔

عالیہ بھٹ نے اپنی والدہ سونی رازدان اور بڑی بہن شاہین بھٹ کے ساتھ ہفتہ کو رانی مکھر جی کی فلم ’’مسز چٹرجی بمقابلہ ناروے‘‘ کی اسکریننگ میں شرکت کی اور تینوں نے سنیما میں ایک ساتھ یہ فلم دیکھی۔

بالی ووڈ اداکارہ نے فلم دیکھنے کے بعد انسٹاگرام پر اپنے جذبات کا اظہار کرتے ہوئے بتایا کہ وہ فلم کے دوران رو پڑی تھیں اور ایک ماں ہونے کے ناطے اس فلم کی کہانی نے ان کو بہت متاثر کیا ہے۔

عالیہ بھٹ نے اپنی انسٹاگرام اسٹوری میں فلم کی ٹیم کو مبارکباد دیتے ہوئے لکھا کہ ’’مسز چٹرجی بمقابلہ ناروے‘‘ ایک ایسی کہانی ہے جو سب کو سنانی چاہئے اور میرے لیے یہ کہانی خاص طور پر ایک نئی ماں کے طور پر بہت قریب تھی۔

واضح رہے کہ فلم مسز چٹرجی بمقابلہ ناروے 17 مارچ کو ریلیز کی گئی تھی جس میں رانی مکھر جی نے ایک ماں کا کردار ادا کیا ہے جو اپنے بچوں کو واپس لینے کیلئے ریاست سے لڑ رہی ہے۔

فلم میں دکھایا گیا ہے کہ ناروے کی حکومت نے مسز چٹرجی کے بچوں کو ان سے یہ کہہ کر چھین لیا تھا کہ وہ بطور ماں انکی ٹھیک سے نگہداشت نہیں کرتیں اور انہیں بتایا گیا تھا کہ بچوں کو 18 سال کی عمر تک واپس نہیں کیا جائے گا۔

فلم ’مسز چیٹرجی ورسز ناروے‘ آج ریلیز ہوگئی ہے، یہ فلم بھارتی خاتون ساگاریکا بھٹاچاریا چکرورتی کی اصل زندگی سے ماخوذ ہے جن کے بچوں کو ناروے کی حکومت نے اپنی تحویل میں رکھ لیا تھا۔

بھارت میں تعینات ناروے کے سفیر نے فلم پر اعتراض اٹھادیا ہے، انہوں نے کہا کہ فلم میں حقائق کو غلط انداز سے پیش کیا گیا ہے اور یہ اصل کیس کی خیالی عکاسی ہے، یہ بات سفیر نے ایک بھارتی اخبار کیلئے کالم لکھتے ہوئے کہی۔

دوسری طرف فلم پروڈیوسر نکھل ایڈوانی نے بتایا کہ کس طرح سفیر فرائیڈنلنڈ نے فلم دیکھنے کے بعد ساگاریکا چکرورتی سے تنبیہی انداز میں بات کی۔ان کا کہنا تھا کہ میرے سامنے نارویجن سفیر ساگاریکا سے تلخ انداز میں بات کر رہے تھے۔