ویمنز T20: پاکستان کو مسلسل دوسری شکست، جنوبی افریقا نے پاکستان کو 2 وکٹوں سے ہرا دیا
آئی سی سی ویمنز ٹی 20 ورلڈ کپ میں پاکستان ویمن کرکٹ ٹیم کو ایونٹ میں مسلسل دوسری شکست کا سامنا کرنا پڑا، جہاں جنوبی افریقہ کی ویمنز ٹیم نے سنسنی خیز مقابلے کے بعد پاکستان کو 2 وکٹوں سے شکست دے دی۔
پاکستان نے ٹاس جیت کر پہلے بیٹنگ کا فیصلہ کیا، تاہم ٹیم کا ٹاپ آرڈر ایک بار پھر خاطر خواہ کارکردگی دکھانے میں ناکام رہا۔ پاکستانی ویمنز ٹیم نے مقررہ 20 اوورز میں 9 وکٹوں کے نقصان پر 126 رنز بنائے اور جنوبی افریقہ کو جیت کے لیے 127 رنز کا ہدف دیا۔
قومی ٹیم کی جانب سے کپتان فاطمہ ثنا نے ذمہ دارانہ بیٹنگ کرتے ہوئے 55 رنز کی عمدہ اننگز کھیلی اور ٹیم کو قابلِ ذکر مجموعی سکور تک پہنچانے میں اہم کردار ادا کیا۔ طوبیٰ حسن 23 رنز کے ساتھ دوسری نمایاں بیٹر رہیں۔ دیگر بیٹرز میں عائشہ ظفر 9، رامین شمیم 6، نتالیہ پرویز 4، گل فیروزہ 1 جبکہ مبینہ علی کوئی رن بنائے بغیر آؤٹ ہو گئیں۔
ہدف کے تعاقب میں جنوبی افریقہ کی ٹیم نے جارحانہ انداز اپنایا اور 16.5 اوورز میں 8 وکٹوں کے نقصان پر مطلوبہ 127 رنز حاصل کر لیے۔ جنوبی افریقہ کی جانب سے اینری ڈیر کسن نے شاندار نصف سنچری سکور کرتے ہوئے 52 رنز بنائے اور اپنی ٹیم کی فتح میں کلیدی کردار ادا کیا۔
پاکستانی باؤلرز نے درمیانی اوورز میں چند اہم وکٹیں حاصل کر کے میچ میں واپسی کی کوشش کی، تاہم جنوبی افریقی بیٹرز نے دباؤ کا سامنا کرتے ہوئے اپنی ٹیم کو کامیابی سے ہمکنار کر دیا۔
خیال رہے کہ یہ پاکستانی ویمنز ٹیم کی ٹورنامنٹ میں مسلسل دوسری شکست ہے۔ اس سے قبل قومی ٹیم کو اپنے پہلے میچ میں بھارت کے ہاتھوں شکست کا سامنا کرنا پڑا تھا، تاہم اب جنوبی افریقہ کے ہاتھوں شکست کے بعد پاکستان کی سیمی فائنل تک رسائی کی امیدیں مزید مشکل ہو گئی ہیں۔ تاہم ٹیم مینجمنٹ کا ماننا ہے کہ پاکستانی ویمنز ٹیم ٹورنامنٹ میں اپنی پہلی کامیابی حاصل کرنے کے لیے اگلے میچ میں بہتر کارکردگی دکھانے کی بھرپور کوشش کرے گی۔
