سری لنکا کی اداکارہ’صنف آہن’ کا حصہ بننے کو تیارہو گئی

سری لنکا کی اداکارہ’صنف آہن’ کا حصہ بننے کو تیارہو گئی
فوج کی خواتین افسران و اہلکاروں کی کہانی پر مبنی ڈراما سیریل ’صنف آہن‘ میں اب سری لنکا کی اداکارہ کو بھی شامل کیا گیا ہے۔

ڈرامہ سیریل ’صنفِ آہن‘ کی کاسٹ میں اب سری لنکن اداکارہ یحالی تاشیا کا اضافہ کیا گیا ہے۔

وہ اس ڈرامے میں ایسی سری لنکن کیڈٹ کا کردار ادا کریں گی جو دوسری خواتین کیڈٹ کے ہمراہ ٹریننگ کے لیے پاکستان آتی ہے۔

ڈرامے کی پروڈیوسرز ثمینہ ہمایوں سعید اور ثنا شاہنواز نے یحالی کو ڈرامے کی کاسٹ میں شامل کیے جانے کی خبر کی تصدیق بھی کی ہے۔
اس کی مرکزی کاسٹ میں سائرہ یوسف، سجل علی، کبریٰ خان، یمنٰی زیدی اور رمشا خان شامل ہیں جبکہ بعدازاں عثمان مختار اور میرب علی کو بھی ڈرامے کا حصہ بنایا گیا تھا۔

تمام اداکاراؤں نے بھی رواں برس جون میں ’صنف آہن‘ سے متعلق انسٹاگرام پوسٹس کی تھیں، یہ پہلا موقع ہوگا کہ پانچوں مرکزی اداکارائیں ایک ساتھ کام کریں گی۔

ڈرامے کے حوالے سے اداکارہ سائرہ یوسف نے ایک انٹرویو میں بتایا تھا کہ ’صنف آہن‘ کی کہانی فوج کی 5 خواتین افسران کے گرد گھومتی ہے جو مختلف طبقہ ہائے زندگی سے تعلق رکھنے والے خاندانوں سے تعلق رکھتی ہیں مگر آرمی کا حصہ بننے کے بعد ان کی منزل ایک ہوجاتی ہے۔