مائیک ٹائسن کا روئے جونز جونیئر کے خلاف رنگ میں واپسی کا اعلان

سابق ورلڈ ہیوی ویٹ چمپئن مائیک ٹائسن نے 15 برس بعد رنگ میں واپسی کا اعلان کردیا اور 12 ستمبر کو ان کا مقابلہ روئے جونز جونیئر سے ہوگا۔ مائیک ٹائسن نے ٹوئٹر پر ایک پیغام میں رِنگ میں اپنی واپسی کا اعلان کیا۔ایک اور ٹوئٹ میں انہوں نے تمام کھیلوں کے عظیم کھلاڑیوں کو واپسی کرنے کا کہا۔
مائیک ٹائسن لاس اینجلس میں 12 ستمبر کو نمائشی مقابلے میں فورڈویژن ورلڈ چیمپئن کا سامنا کریں گے۔ مقابلہ 8 راؤنڈز پر مشتمل ہوگا اور اس مقابلے کے نشریاتی حقوق سوشل میڈیا اور میوزک ویب سائٹ ٹریلر نے حاصل کرلیے ہیں جو مقابلے سے قبل تیاریوں کو بھی نشر کرے گا۔ سابق عالمی چیمپئن کی رنگ میں واپسی کے موقع پر میوزک بھی ہوگا۔
https://twitter.com/MikeTyson/status/1286344625318486023

Introducing my new venture. Legends Only League, bringing back legends of all sports. @TysonLeague https://t.co/HllhUXyYG4 pic.twitter.com/647q4g5LTX

— Mike Tyson (@MikeTyson) July 23, 2020

یاد رہے کہ مائیک ٹائس نے رواں برس مئی میں اپنی ٹریننگ کی ایک ویڈیو سوشل میڈیا پر جاری کی تھی جس پر ان کے مداحوں نے باکسنگ میں واپسی پر زور دیا تھا۔ویڈیو میں مائیک ٹائسن کو ڈبلیو بی اے، ڈبلیو بی سی اور آئی بی ایف کے ٹائٹل کو اٹھائے ہوئے دکھایا گیا تھا اور اسی ویڈیو میں پیغام تھا کہ ‘میں واپس آگیا ہوں’۔ بعد ازاں مائیک ٹائسن کا کہنا تھا کہ وہ خیراتی اداروں کے لیے عطیات جمع کرنے کے لیے رنگ میں واپسی کے خواہاں ہیں جس کے بعد آئرن مائیک کے نام سے مشہور باکسر سے مقابلے کے لیے کئی نام سامنے آگئے تھے۔
خیال رہے کہ ریکارڈ 7 بیلٹ حاصل کرنے والے 51 سالہ روئے جونز جونیئر نے آخری مرتبہ 2018 میں فائٹ کی تھی۔
علاوہ ازیں ٹائسن سے مقابلے کے لیے روئے جونز جونیئر سے قبل اطلاعات کے مطابق پرانے حریف ایوانڈر ہولی فیلڈ اور نیوزی لینڈ رگبی ٹیم کے عظیم کھلاڑی سونی بل ولیمز نے بھی مقابلے کے لیے اپنا نام دیا تھا۔
مائیک ٹائسن نے 20 سال کی عمر میں 1986 میں ٹریور بیربیک کو شکست دے کر کم عمر ترین ہیوی ویٹ چمپیئن بننے کا ریکارڈ قائم کیا تھا۔
آئرن مائیک نے اپنے شان دار کیریئر میں 58 پروفیشنل مقابلوں میں 50 مرتبہ کامیابی سمیٹی اور 2005 میں کیون مک برائیڈ سے شکست کے بعد باکسنگ کو خیرباد کہہ دیا تھا۔