احسن اقبال کا ڈونرز فنڈز ناکامی کا دعویٰ مسترد

وفاقی وزیر منصوبہ بندی احسن اقبال نے اس تاثر کو رد کردیا ہے کہ پاکستان 2022 کے سیلاب زدگان کی بحالی کے لیے عالمی ڈونرز سے 10.9 ارب ڈالر حاصل کرنے میں ناکام رہا ہے۔

اسلام آباد میں ماہانہ ترقیاتی رپورٹ کے اجرا کے موقع پر پریس کانفرنس کرتے ہوئے احسن اقبال نے کہا کہ سندھ اور بلوچستان میں بحالی کے تمام منصوبے منظور ہو چکے ہیں، جن کے لیے 6.32 ارب ڈالر مختص کیے گئے ہیں۔ یہ رقم تین سالہ مدت میں استعمال ہوگی اور منصوبے عملدرآمد کے مرحلے میں ہیں۔

وزیر منصوبہ بندی نے وزیر خزانہ محمد اورنگزیب کے اس بیان سے اختلاف کیا کہ پاکستان سیلاب کے بعد قابلِ سرمایہ کاری منصوبے پیش کرنے میں ناکام رہا۔ انہوں نے کہا کہ منصوبے پہلے ہی طے ہیں اور مقررہ مدت کے اندر مکمل کر لیے جائیں گے۔

احسن اقبال نے مزید بتایا کہ پاکستان اور چین نے ایم ایل-1 ریلوے منصوبے کی مالی معاونت کے لیے کثیرالملکی عطیہ دہندگان کو شامل کرنے پر اتفاق کر لیا ہے۔