علیمہ خان کے پانچویں بار ناقابلِ ضمانت وارنٹِ گرفتاری جاری

راولپنڈی کی انسدادِ دہشت گردی عدالت نے تحریک انصاف کی رہنما علیمہ خان کے پانچویں مرتبہ ناقابلِ ضمانت وارنٹِ گرفتاری جاری کر دیے۔

عدالت کے جج امجد علی شاہ نے 26 نومبر کے احتجاج سے متعلق مقدمے کی سماعت کی، جس میں علیمہ خان سمیت 11 ملزمان نامزد ہیں۔
علیمہ خان ناقابلِ ضمانت وارنٹ جاری ہونے کے باوجود آج بھی عدالت میں پیش نہ ہوئیں۔

سماعت کے دوران استغاثہ کے 5 گواہان اور دیگر 10 ملزمان عدالت میں موجود تھے، جبکہ اسپیشل پراسیکیوٹر ظہیر شاہ اپنی ٹیم کے ہمراہ پیش ہوئے۔

عدالت میں علیمہ خان کی جانب سے کوئی وکیل بھی پیش نہیں ہوا، جس پر جج نے اُن کے ناقابلِ ضمانت وارنٹِ گرفتاری پانچویں بار جاری کرتے ہوئے کیس کی سماعت 30 اکتوبر تک ملتوی کر دی۔

واضح رہے کہ علیمہ خان کا شناختی کارڈ، پاسپورٹ اور بینک اکاؤنٹس پہلے ہی بلاک کرنے کا حکم دیا جا چکا ہے، جبکہ عدالت نے نادرا، پاسپورٹ اینڈ امیگریشن ڈپارٹمنٹ اور اسٹیٹ بینک سے رپورٹ طلب کر رکھی ہے۔