پیپلزپارٹی آزاد کشمیر اجلاس کا مقام چوتھی بار تبدیل، نئے وزیراعظم کی نامزدگی کا امکان

پاکستان پیپلزپارٹی آزاد کشمیر کی پارلیمانی پارٹی کے اجلاس کا مقام اور وقت چوتھی مرتبہ تبدیل کر دیا گیا۔

ذرائع کے مطابق چیئرمین پیپلزپارٹی بلاول بھٹو زرداری نے پارلیمانی گروپ کا اجلاس آج شام زرداری ہاؤس اسلام آباد میں طلب کیا ہے، جس میں بلاول بھٹو کے ہمراہ فریال تالپور بھی شریک ہوں گی۔

ذرائع کا کہنا ہے کہ آزاد کشمیر اسمبلی میں پیپلزپارٹی کے تمام ارکان کو اجلاس میں شرکت کی ہدایت دی گئی ہے۔ اجلاس میں نئے وزیراعظم کی نامزدگی کا امکان بھی ظاہر کیا جا رہا ہے۔

ذرائع کے مطابق اجلاس میں وزیراعظم آزاد کشمیر انوارالحق کو عہدے سے ہٹانے اور نئی حکومت کی تشکیل سے متعلق حکمت عملی طے کی جائے گی۔

دوسری جانب، اطلاعات ہیں کہ وزارتِ عظمیٰ کے لیے مطلوبہ حمایت حاصل کرنے کی غرض سے فریال تالپور کی اہم ملاقاتیں جاری ہیں۔ اگر پیپلزپارٹی کو 27 ارکانِ اسمبلی کی حمایت حاصل ہو گئی تو آج ہی نئے وزیراعظم کی نامزدگی متوقع ہے۔

ذرائع کے مطابق وزارتِ عظمیٰ کے لیے پارٹی صدر چوہدری یاسین، لطیف اکبر اور سردار یعقوب کے نام زیرِ غور ہیں۔